Rrjeti televiziv amerikan, CNN ka analizuar pasojat e sulmit ushtarak të Izraelit ndaj objekteve ushtarake të Iranit. CNN raporton se Irani prej vitesh ka punuar për të forcuar objektet e tij bërthamore kundër kërcënimit të sulmeve ushtarake. Për këtë arsye, kjo gjë e bën të vështirë shkatërrimin e tyre të plotë, sipas ekspertëve ushtarakë që folën për CNN.
“Lloji i betonit që ata (iranianët) po përdorin është shumë i specializuar dhe i përforcuar”, shprehet për CNN, analisti ushtarak, Sentry Layton. Ai shtoi se është e paqartë nëse bombat izraelite mund të depërtojnë në këtë lloj betoni.
“Izraelitët do të duhet të nisin sulme të njëpasnjëshme për të llogaritur më pas pasojat tek ai objekt që është sulmuar”, shpjegon ai.
Përveç kësaj, disa objekte janë “varrosur” nën tokë, në mënyrë që ato të jenë të paarritshme për armët izraelite.
Alex Plitsas, një bashkëpunëtor i lartë në Këshillin Atlantik, tha se objektet bërthamore nëntokësore të Teheranit janë të lidhura me tunele me kthesa 90 gradë, duke shtuar një shtresë shtesë kompleksiteti.
“Raketat kruiz nuk mund të bëjnë një kthesë 90 gradë… kështu që opsionet janë të kufizuara”, shpjegoi ai.
Dëmet e shkaktuara nga sulmet e Izraelit
Sulmi i Izraelit ndaj Iranit ishte më i gjerë dhe më i ashpër se dy operacionet ushtarake të vitit të kaluar. Gjithashtu, IDF duket se ka përvetësuar strategjinë e sulmit izraelit ndaj Hezbollahut në Liban nëntorin e kaluar, vëren Sebastian Asher në analizën e tij për BBC-në.
Izraeli jo vetëm që goditi objektet raketore të Iranit – dhe kështu aftësinë e tij për t’u përgjigjur me forcë – por gjithashtu nisi sulme për të eliminuar anëtarët kryesorë të udhëheqjes së Iranit.
Kjo strategji e “prerjes së kokës” së udhëheqjes së lartë të Hezbollahut pati pasoja shkatërruese për aftësinë e saj për të organizuar një kundërsulm të qëndrueshëm.
Pamjet nga Teherani tregojnë ndërtesa specifike që goditen, të ngjashme me imazhet nga sulmet e Izraelit në periferitë jugore të Bejrutit, të cilat kulmuan me vrasjen e udhëheqësit të Hezbollahut, Hassan Nasrallah.
Asnjë figurë e një rëndësie të tillë nuk duket të jetë vrarë në Iran. Udhëheqësi Suprem Ali Khamenei nuk është shënjestruar nga sulmet me raketa dhe dronë.
Megjithatë, vrasja e shefit të shtabit të Iranit, komandantit të Gardës së fuqishme Revolucionare dhe disa prej shkencëtarëve më të mirë bërthamorë të vendit në orët e para të një operacioni – i cili, sipas kryeministrit izraelit Benjamin Netanyahu, mund të zgjasë me ditë – do të thotë se elitës së Iranit i është shkaktuar dëm i paparë.
Kjo duket se kërkon një përgjigje më të ashpër nga Irani sesa dy sulmet e tij ndaj Izraelit vitin e kaluar. Megjithatë, kjo mund të pengojë ndjeshëm edhe aftësinë e Teheranit për të ndërmarrë një përgjigje të tillë.
Kjo është ndoshta ajo që Netanyahu vlerësoi kur urdhëroi përshkallëzimin e konfliktit, vëren analisti i BBC-së.
