Rrëmuja që ka shkaktuar Porto për Taremin dhe oferta e Milanit – agjenti i lojtarit zbulon prapaskenat.
Ka një konfuzion në rritje për atë që shkoi keq në përpjekjen e Milanit për të nënshkruar me Mehdi Taremin nga Porto.
Dy klubet në dukje kishin rënë dakord për një transferim me vlerë 15 milionë euro dhe menduan se edhe kushtet personale do të ishin relativisht të thjeshta.
Megjithatë, u shfaqën probleme me ndërmjetësues të ndryshëm që rritën kërkesat dhe Sky Sport Italia sugjeron se ata dyfishuan apo edhe trefishuan kërkesat e mëparshme.
Situata është edhe më misterioze pasi agjenti i Taremit, Pedro Pinto, ka dhënë një intervistë për gazetën portugeze Record.
“Klubi nuk ka folur kurrë me mua. Lojtari i paralajmëroi ata se po flisnin me agjentin e gabuar, por vazhdoi kështu për dy muaj”, ka deklaruar Pinto.
“Paga që ishte propozuar nuk ishte në përputhje me vlerën e lojtarit. Asnjëherë nuk jemi afruar me diskutimin e komisionit. Milani duhet të sigurojë provat nëse ata pretendojnë se kjo është ajo që ka ndodhur”.
Mediat italiane bënë me dije se ndërmjetësit që shkaktuan probleme ishin ata të zgjedhur nga Porto dhe që janë pranë skuadrës portugeze.
“Pas marrëveshjes mes klubeve, kuqezinjtë kontaktuan lojtarin, i cili i shpjegoi se kush është përfaqësuesi i tij”, vazhdoi Pedro Pinto.
“Nuk e di pse vazhduan të flisnin me agjentët e gabuar, nuk mund ta shpjegoj. Nuk ka asnjë klub në botë që zgjedh se kush i përfaqëson lojtarët e tij. Tani ata po kërkojnë koka turku për të justifikuar dështimin për të nënshkruar lojtarin”, ka shtuar ai.
Sigurisht që u ngritën disa vetulla kur u raportua se Taremi kishte rënë dakord për një pagë prej vetëm 1.5 milionë euro në sezon në San Siro, dhe kjo me të vërtetë doli të ishte e gabuar.
Nuk është hera e parë këtë verë që ndërmjetësit kanë turbulluar ujërat e një transferimi, duke shkaktuar rrëzimin e një marrëveshjeje që dukej se ishte bërë.
