Arneud D’anjean tani është anëtar i Parlamentit Evropian. Por, ai dikur është përfolur si një agjent i DGSE-së që e ka rekrutuar Hashim Thaçin. Ky francez, sot, është parë në Zyrat e Presidentit të Republikës së Francës, Emmanuel Macron, në një tavolinë bashkë me Hashim Thaçin dhe zyrtarë të tjerë
Në një dokumentar të Canal+ që Gazeta Express e ka transmetuar dy vjet më parë, dikur oficer hulumtues për çështje të Ballkanit në shërbimin sekret francez DGSE, Arnaud Danjean, përshkruhet si mik i Hashim Thaçit.
Po ashtu, thuhej se ai kishte ndërmjetësuar në raportet ndaj Shërbimit Sekret Francez me Thaçin. Pas 7 vjetëve në DGSE, ai aktualisht është deputet në Parlamentin Evropian. Ai, gjithashtu, flet gjuhën serbe dhe mund të thuhet se është specialist për Ballkanin.
“Ne kemi dashur ta dimë se si është bërë rekrutimi i Hashim Thaçit, por Danjean nuk pranoi të flasë për këtë çështje”, thuhej në dokumentarin e Canal+.
Sido që të jetë eprori i Danjean Pierre Siramy, madje kishte pranuar se Franca e ka furnizuar me armë UÇK-në.
Lidhja franceze me Hashim Thaçin kishte filluar në Francë, në Kështjellën e Rambujesë. Madje thuhet se aty Thaçi ishte bërë agjent i Francës.
Se a u bë Hashim Thaçi agjent sekret, Siramy thotë: “Po, ai është bërë agjent”.
Por, këto lidhje të Thaçit me D’anjean s’kanë përfunduar.
Hashim Thaçi ka bërë sot një vizitë të paparalajmëruar te Presidenti i Francës, Emanuel Macron, në Pallatin Elysee.
“Sot, në Pallatin Elysee pata kënaqësi të pritem nga presidenti i Francës, Emannuel Macron, me të cilin zhvilluam një bisedë miqësore.
Presidenti Macron, me vizionin dhe dinamizmin e tij i jep shpresë tërë Evropës, përfshirë edhe vendet që aspirojnë të integrohen në BE.
Në emër të Kosovës ia shpreha falënderimin për mbështetjen e vazhdueshme të Francës për shtetin e Kosovës.
Kosova është mirënjohëse për kontributin e jashtëzakonshëm të Francës për afirmimin e Kosovës në arenën ndërkombëtare.
Me këtë rast ftova presidentin Macron për ta vizituar Kosovën.
E falënderoj presidentin Macron që e pranoi dhe e konfirmoi vizitën në Kosovë.
Franca ka qenë dhe do të jetë përkrahëse e fuqishme e Kosovës. HTH”, ka shkruar Thaçi.
Por, në fotografitë që janë publikuar sot bashkë me Thaçin, këshilltarin e tij Bekim Çollakun, ambasadorin e Kosovës dhe zyrtarë tjerë shihet edhe D’anjean agjenti i dikurshëm tani i shndërruar në politikan.
