Një aksident ka ndodhur mbrëmjen e sotme në aksin nacional Dimal-Berat, në hyrje të fshatit Moravë, ku ka mbetur i lënduar një 27-vjeçar.
Një automjet, tip Mercedes Benz, që po udhëtonte drejt qytetit të Beratit, ka dalë nga rruga dhe ka përfunduar në kallamishte në anë të rrugës. Goditja ka qenë shumë e fortë, duke shkaktuar shkatërrimin e pjesës së përparme të mjetit, ndërkohë që drejtuesi i tij ka shpëtuar mrekullisht nga goditja.
Drejtuesi i mjetit, Marjus Mata, 27 vjeç, ka pësuar thyerje në krahun e majtë dhe shembje në shumë pjesë të trupit.
Ai është transportuar me ambulancë drejt Spitalit Rajonal të Beratit, ku ndodhet nën kujdesin e mjekëve, jashtë rrezikut për jetën. Të riu i është bërë testi i alkoolit dhe ka rezultuar negativ.
Në vendngjarje kanë mbërritur efektivë të shumtë të policisë rrugore, të cilët po kryejnë këqyrjen e vendit të aksidentit për të konkluduar mbi shkaqet dhe dinamikën e ngjarjes, pasi ky aks rrugor karakterizohet për mungesë ndriçimi.
