Aleksis Tsipras i kërkon Turqisë lirimin e ushtarëve grekë

Kryeministri i Greqisë Aleksis Tsipras dërgoi mesazh në Ankara gjatë mbledhjes së Këshillit të qeverisë, lidhur me rastin e dy ushtarëve grekë të ndaluar në Turqi.
Sipas informacioneve, kryeministri Tsipras iu referua rastit të dy ushtarëve grekë dhe theksoi se “ka nevojë për trajtim të kujdesshëm dhe durim”.
“Turqia herët a vonë do të kuptojë se çdo mendim për të shfrytëzuar dhe përdorur për qëllime të tjera një ngjarje të përbashkët në lidhje me kufirin, do të jetë kundër saj “, tha ai.
Alexis Tsipras kishte ditën e djeshme një bisedë telefonike me Sekretarin e Përgjithshëm të OKB-së, Antonio Guterres. Gjatë bisedës, kryeministri e informoi atë mbi progresin e negociatave me Maqedoninë, por edhe për sjelljen e Turqisë në lidhje me ushtarët grekë.
Kryeministri i kërkoi Sekretarit të Përgjithshëm të OKB-së që të përcjellë mesazhin në anën turke , në lidhje me nevojën për një rezultat të shpejtë dhe pozitiv të lirimit dhe kthimit të ushtarëve në Greqi.