Kryetari i Bashkimit Demokratik për Integrim, Ali Ahmeti, ka takuar Ambasadorin e Norvegjisë, Arne Sannes Bjornstad, me të cilin kanë diskutuar rreth zhvillimeve politike në Maqedoni, por edhe për dialogun Kosovë – Serbi.
Lideri Ahmeti njoftoi Ambasadorin Bjornstad rreth përgatitjeve të Bashkimit Demokratik për Integrim në vigjilje të referendumit dhe theksoi gatishmërinë e lartë të të gjitha strukturave të BDI-së për të kontribuar për rezultat të suksesshëm më 30 shtator.
Sipas një komunikate të BDI-së, Ahmeti gjithashtu përsëriti rolin e rëndësishëm të opozitës duke e ftuar të bëhet pjesë e përfundimit të rrugëtimit tonë të përbashkët drejt Brukselit.
Sa i përket zhvillimeve rajonale, Ahmeti mbështeti dialogun midis Republikës së Kosovës dhe Serbisë për të gjetur zgjidhje përfundimtare për njohje të ndërsjellë dhe paqe të qëndrueshme në rajon.
