Partitë opozitare shqiptare Aleanca për Shqiptarët dhe Alternativa, nëpërmjet një kumtese për media kanë akuzuar disa prokurorë në vend, se mbrojnë zyrtarët partisë në pushtet, BDI.
Nga ASH dhe AAA thonë se gjykatat dhe prokuroritë vazhdojnë të jenë të partizuara dhe të politizuara, duke iu referuar rastit me dënimin e funksionarëve të BDI-së Ejup Alimi dhe Ismet Guri.
“Këta prokuror dhe gjykatës të zgjedhur e të emëruar nga BDI, asnjëherë nuk e ngritën zërin e tyre ndaj proceseve të montuara politike ndaj shqiptarëve dhe kurrë nuk i mbrojtën ata siç po i mbrojnë zyrtarët e BDI-së. Janë këto prokuror e gjykatës të BDI, njëjtë si ato të afërt me LSDM tani dhe dikur me OBRM-PDUKM që e mbajnë peng sistemin e drejtësisë dhe pamundësojnë reforma në sistemin e drejtësisë. Aleanca për Shqiptarët & AlternAtivA e ripërsërit qëndrimin se detyrimi për ridefinimin e sistemit të drejtësisë është çështja më urgjente në vendin tonë. Ne si koalicion kemi nisur një letër ministrave të jashtëm të vendeve anëtare të BE për dërgimin e një misioni të BE-së, që do ta reformojë sistemin e drejtësisë dhe që do të merret veçmas me rastet e montuar politike, për të cilën vlerësojmë se është bërë domosdoshmëri për perspektivën e Maqedonisë së Veriut”, thuhet në reagimin e ASH-së dhe AAA.
Ata kërkojnë nga faktori ndërkombëtar që ta marrë seriozisht kërkesën e tyre për të ndihmuar në reformimin e drejtësisë, në të kundërtën thonë se Maqedonia e Veriut do të rrëshqet drejt modelit të Bjellorusisë./Telegrafi/
