Paralajmërimi se do të sillej me detyrim në gjykatë, ka bërë që këtë të mërkurë Sami Lushtaku të paraqitej në gjykimin ku ai së bashku me 6 persona të tjerë akuzohen lidhur me tenderin milionësh të KEK-ut.
Por, seanca përsëri, në këtë rast, është anuluar. Kësaj radhe, shkak ka qenë mungesa e avokatëve të cilët kanë nisur bojkotin e punës.
Për një orë rresht, të akuzuarit në rastin e KEK-ut kanë pritur nisjen e seancës.
Në Gjykatën Themelore në Prizren u anuluan rreth 50 seanca gjyqësore, shkaku i bojkotimit të avokatëve, ka bërë të ditur për KTV-në zëdhënësja e kësaj gjykate, Afërdita Kicaj.
Por, jo të gjitha seancat këtë të mërkurë dështuan në mungesë të avokatëve.
Në gjykimin për terrorizëm në Prishtinë, të cilin e kryesonte gjyqtari Vesel Ismajli, seanca gjyqësore është zhvilluar normalisht.
Avokati Haxhi Millaku është i bindur se nuk doli kundër bojkotit të kolegëve të tij kur vendosi të marrë pjesë në këtë seancë .
Por, ka edhe avokatë që nuk e mbështesin bojkotin e kolegëve të tyre.
Avokatët po kërkojnë nga Këshilli Gjyqësor i Kosovës që ta tërheqë urdhëresën e cila ua ndalon atyre qasjen në gjykatë pa ftesë apo leje gojore të kryetarit të gjykatës.
Por, Këshilli Gjyqësor i Kosovës nuk e ka ndërmend të tërhiqet nga vendimi i saj.
Ky këshill, përmes një njoftimi për media, ka thënë se mbetet prapa vendimit, pasi që konsideron se duhet vënë rend në gjykata për menaxhimin e qasjes në objektet e gjykatave.
Megjithëkëtë, ky institucion ka ftuar takim të jashtëzakonshëm të enjten, për të diskutuar këtë çështje dhe aty ka ftuar edhe kryetarët e gjykatave të Kosovës.
