Qyteti i Barcelonës në Spanjë gjendet në alarm të hënën, pasi Departamenti i Shtetit i SHBA-ve, paralajmëroi rrezikun e sulmeve terroriste gjatë festës së Krishtlindjes. Kujdesi u rrit rreth zonave ku lëvizin automjetet transportuese përfshirë autobusët në pjesën e Las Ramblas të Barcelonës, shkruan AFP.
“Terroristët mund të sulmojnë me pak ose asnjë paralajmërim, duke shënjestruar lokacionet e turistëve, qendrat e transportit dhe zonat tjera publike” paralajmëroi Byroja e çështjeve konsullore të Departamentit të Shtetit të hënën përmes Twitterit.
I pyetur gjatë një interviste në Rac1 radio, ministri i Brendshëm rajonal, Miquel Buch tha se policia “po angazhohet në trajtimin e këtij kërcënimi”.
Gazeta “El Peridico de Catalunya” njoftoi se policia rajonale ka lëshuar një qarkore të brendshme ku thuhet se një person mund të tentojë të godasë turmën me autobusë. /rel
