Bashkimi Evropian (BE) dënoi “fuqishëm” dhunën e vazhdueshme të kolonëve në Bregun Perëndimor të pushtuar, duke i bërë thirrje Izraelit të ndërmarrë “hapa të menjëhershëm dhe vendimtarë” për të ndaluar sulmet dhe për t’i mbajtur autorët përgjegjës, transmeton Anadolu.
“BE-ja dënon fuqishëm dhunën e vazhdueshme të kolonëve në Bregun Perëndimor të pushtuar. Fushatat e frikësimit, sulmet fizike dhe verbale, si dhe shkatërrimi dhe djegia e pronës dhe shtëpive po çojnë në zhvendosjen e të gjitha komuniteteve palestineze”, tha në një deklaratë shefja e politikës së jashtme të bllokut, Kaja Kallas.
“Izraeli duhet të ndërmarrë menjëherë hapa vendimtarë për të adresuar këtë çështje dhe për të siguruar që autorët e këtyre krimeve të mbahen përgjegjës”, tha Kallas.
Ajo dënoi më tej incidentet gjatë Ditës së Kudsit në Qytetin e Vjetër, veçanërisht “nxitje për dhunë dhe frikësim të banorëve dhe gazetarëve”.
Kallas paralajmëroi se “veprimet provokuese nga udhëheqësit politikë izraelitë në këtë kontekst dëmtojnë statusin dhe karakterin e veçantë të Kudsit dhe Qytetit të tij të Vjetër”.
Ajo gjithashtu shprehu kritika të forta ndaj operacioneve ushtarake të Izraelit në Gaza, duke e përshkruar “përdorimin joproporcional të forcës” dhe vdekjen e civilëve si “të papranueshme”.
“Operacioni ushtarak i Izraelit në Gaza, përdorimi joproporcional i forcës dhe vdekja e civilëve nuk mund të tolerohen”, thuhet në deklaratë, duke shtuar se shënjestrimi i infrastrukturës civile duhet të ndalet.
Ajo bëri thirrje për një kthim në armëpushimin, i cili u braktis nga Izraeli në mars, duke çuar në lirimin e të gjithë pengjeve dhe një fund të përhershëm të armiqësive përmes negociatave.
“BE-ja përsërit se ndihma humanitare nuk duhet të politizohet ose militarizohet kurrë. BE-ja kujton rolin e OKB-së në shpërndarjen e ndihmës humanitare”, shtoi deklarata.
OKB-ja është distancuar nga aktivitetet e Fondacionit Humanitar të Gazës (GHF) të miratuara nga Izraeli, i cili të hënën tha se filloi shpërndarjen e ndihmës në enklavën palestineze, pas një bllokade të plotë izraelite prej më shumë se dy muajsh.
Më parë, Kallas kishte bërë thirrje për një rishikim të marrëveshjes së asociimit të BE-së me Izraelin për shkak të veprimeve të tij në Gaza.
