Qeveria e Serbisë ka formuar Grupin e Punës që do të merret me çështjet e normalizimit të trafikut ajror civil mbi Kosovën dhe me rivendosjen e linjës ajrore Beograd-Prishtinë, ka kumtuar Ministria serbe e Mbrojtjes.
Sipas kësaj kumtese, që e përcjell FoNet, Grupi i Punës do të merret edhe me çështjen e rikthimit të sërishëm të pozicionit të radarit në Kopaonik, me të cilin, siç thuhet, do të krijoheshin kushtet për mbikëqyrje të sigurt të trafikut ajror mbi Kosovën, transmeton Koha.net.
“Formimi i këtij Grupi të Punës nga përfaqësues të institucioneve kompetente, tregon gatishmërinë për vazhdimin e negociatave për këtë çështje të rëndësishme, përkushtimin për ruajtjen e interesave të rëndësishëm vitalë, zhvillimin e paqes e të sigurisë dhe krijimin e klimës së besimit në rajon”, ka thënë kryetari i këtij Grupi, ministri serb i mbrojtjes Zoran Gjorgjeviq i cili ka paralajmëruar biseda për këtë çështje në Bruksel.
Në Grupin e Punës janë ekspertë të Ministrisë së Mbrojtjes e të Ushtrisë së Serbisë, MPJ-së, MPB-së, Ministrisë së Ndërtimit dhe të infrastrukturës, Zyrës për Kosovën, Zyrës për punë koordinuese në procesin negociues me Kosovën, Drejtorisë së aviacionit civil dhe të Agjencisë për kontrollim fluturimesh të Serbisë e Malit të Zi.
© KOHA
