Deputeti i Nismës për Kosovën, Zafir Berisha, ka reaguar ndaj raportimit të ministrit të Punëve të Brendshme, Skënder Hyseni në Komisionin për Siguri, anëtar i së cilit është edhe Berisha.
Duke ia përmendur Hysenit atë që deklaroi se kanë pasur frikë për Policinë për shkak të një objekti të braktisur dhe territ që kishte rënë, Berisha tha se kjo nënkupton se në atë pjesë të vendit veprojnë struktura kriminale parapolitike dhe ushtarake.
“Ministër ju jeni person politik dhe keni qasjen tuaj. Qesharake ka qenë gara se kush e ndaloi trenin, asgjë s’keni bërë më shumë se sa që keni respektuar ligjin dhe Kushtetutën. Por kjo nuk është hera e parë sepse ndërhyrje të Serbisë ka tash e sa vjet si rezultat i politikës së gabuar”, tha Berisha, raporton KP.
Deputeti Berisha tha se krejt kjo vjen si pasojë e bisedimeve në Bruksel ku sipas tij pala kosovare ka lëshuar pe dhe ka rrezikuar sovranitetin e shtetit.
