“Sulmet hibride të Serbisë ndaj Kosovës mund të ndodhin në çdo kohë”.
Kështu deklaroi zëvendëskryeministri i Kosovës Besnik Bislimi, duke iu referua sulmit të 24 shtatorit të vitit të kaluar në Banjskë ku u vra polici Afrim Bunjaku.
Bislimi tha se një luftë konvencionale nuk është e mundur tani për tani, sepse Kosova është e mbrojtur nga KFOR-i, por se vendi duhet të jetë gati për luftë.
“Po, një luftë konvencionale është e pamundur tani, pasi ne jemi të mbrojtur nga paqeruajtësit e KFOR-it. Megjithatë, siç ka treguar shembulli i Banjskës, një sulm hibrid gjithmonë mund të fillohet kundër nesh dhe ne duhet të përgatitemi që kjo mund të ndodhë përsëri në çdo kohë”, tha Bislimi, për platformën ukrainase të lajmeve “European Pravda” transmeton Klankosova.tv
Numri dy i qeverisë kosovare shtoi se ekzistojnë arsye për të besuar se Rusia ishte e përfshirë drejtpërdrejt në sulm.
“Në jug të Serbisë, në qytetin e Nishit, i cili nuk është shumë larg kufirit me Serbinë, ekziston e ashtuquajtura Qendra Humanitare Ruse e cila zyrtarisht është e angazhuar në sigurinë nga zjarri, por askush nuk ka parë ndonjë rezultat të punës së saj. ”, tha ai.
Bislimi thekson “Perëndimi pajtohet me provat se sulmi në veri ishte një hibrid që i kishte rrënjët në lidershipin e lartë të Serbisë”./Klankosova.tv
