Si pjesë e programit të testimit, së shpejti 40 modele BMW Series 7 pa shoferë do të përgatiten për të qarkulluar nëpër rrugët e Shteteve të Bashkuara.
Ky është rezultat i bashkëpunimit në mes të prodhuesit prestigjioz gjerman BMW dhe kompanisë së njohur të teknologjisë, Intel, transmeton Koha.net.
Të gjitha këto 40 modele janë të pajisur me sistemin e Intelit për procesim, sistem i cili mund të procesojë të dhënat deri në katër terabajt për 90 minuta.
Gjithashtu, këto modelet do të përdorin edhe kamerat dhe radarin nga kompania Mobileye.
Shumica e të dhënave do të procesohen në veturë, ndërsa një pjesë e të dhënave do të dërgohet edhe në sistemin qendror ku do të shfrytëzohen kryesisht për diagnostifikim parandalues dhe për përditësimin e hartave për rrugë.
“Qëllimi i këtij bashkëpunimi është lejimi që Inteli të zhvillojë ‘një platformë bazike funksionale’ për veturat pa shoferë të cilat do ta merrnin pastaj prodhuesit e veturave si licencë”, ka thënë Marcie Miller, zëdhënësja e Intelit.
Modelet e reja BMW Series 7, po ashtu, do të jenë të pajisur edhe me teknologjinë 5G të kompanisë Ericson, teknologji e cila është e njohur për siguri në komunikacion.
