Theresa May është e gatshme të hyjë në luftë për të mbrojtur Gjibraltarin ashtu siç Margaret Thatcher bëri dikur për ishujt Falkland.
Kështu deklaroi ish lideri i konservatorëve britanikë Michael Howard, komente që menjëherë u kritikuan si provokuese.
Sugjerimi i lordit Howard, se kryeministrja është gati të bëjë luftë me Spanjën, për Gjibraltarin, u bë njëkohësisht me zotimin e qeverisë për të mbrojtur sovranitetin e këtij territori britanik.
Analistët thonë se përfshirja e Gjibraltarit në propozimet për negociatat e BE, i ka hapur rrugën spekulimeve me pasoja mjaft reale.
Sir Micheal Fallon, ministri britanik i mbrojtjes, i pyetur për të njëjtën çështje, përdori gjuhë mjaft të fortë dhe tha se Britania do të mbrojë Gjibraltarin në çdo mënyrë. Pak minuta pas ministrit pasoi reagimi i lordit Howard.
“35 vjet më parë, një tjetër grua kryeministre dërgoi ushtrinë matanë botës, për të mbrojtur lirinë e një tjetër grupi të vogël britanikësh, nga një tjetër vend që flet spanjisht. Jam i bindur se edhe kryeministrja aktuale do të tregojë të njëjtën vendosmëri duke mbrojtur popullin e Gjibraltarit”, deklaroi lordi Howard.
I menjëhershëm reagimi kundër komenteve të tij, sidomos nga liberal-demokratët që thanë se shndërrimi i konservatorëve është tronditës, pasi brenda katër ditëve nga dorëzimi i kërkesës për Brexit, kaluan nga brohoritjet tek vringëllimat e shpatave. /tch/
