Shqiptari Besjan Muja, i konsideruar si një ndër figurat kryesore të bandës së trafikantëve që qëndronte pas drogës me vlerë 750 mijë paund, të kapur në Gloucestershire, është dënuar me 2 vjet burg, raportojnë sot mediat britanike.
10 persona u arrestuan në operacionin e policisë në disa fabrika kanabisi dhe në prona që kontrolloheshin nga kjo bandë, në Gloucester dhe Cheltenham në 11 tetor të vitit të shkuar, transmeton Syri.
Pjesë nga ky operacion u transmetuan edhe në programin e Jeremy Kyle, The Kyles Files, që transmetohet në kanalin britanik ITV.
Të gjithë të arrestuarit u dënuan me burg, pasi pranuan akuzat për prodhim të drogës së Klasit B dhe akuza të tjera.
I fundit që u burgos ishte shqiptari Besjan Muja. 31-vjeçari u dënua me 2 vjet heqje lirie nga Gjykata e Bristol të premten e shkuar.
Teksa dha pretencën në prill, prokurori Ed Hetherington e përshkroi atë si një prej figurave kryesore të kësaj bande, së bashku me shqiptarët e tjerë Elis Gashi, Dardan Hoxhaj dhe Jeton Muja.
Anëtarët e tjerë të bandës: Gurgen Nikoci, Jeton Muja, Kreshmik Muja, Dardan Hoxhaj, Dritan Muhametaj, Elis Gashi, Ardit Agaaj, Bardhyl Arifaj, Aranit Kasaheri
Muja fillimisht e mohoi akuzën për shpërndarje dhe prodhim kanabisi, por e ndryshoi qëndrimin e tij pak përpara se të niste gjyqi në prill.
Ai pranoi gjithashtu posedimin e të mirave me burim kriminal, pasi gjatë kohës së arrestimin autoritetet policore i gjetën 7,500 paund kesh në automjet.
Aksioni i policisë britanike erdhi pas një hetimi 8 mujor për këtë bandë, e cila kishte lidhje në Forest Dean, Bristol, Birmingham dhe Liverpool.
Oficerët gjetën 908 bimë kanabis, me vlerë rreth 750 mijë paund, në ato që prokurori Hetherington i përshkroi si “fabrika tejet të sofistikuara” të prodhimit të kanabisit.
