Në emisionin Ftesë në Studio ne Alsat ishte i ftuar eksperti i punësimit, Arber Xhihani, për të diskutuar mbi dilemën që përballin të rinjtë në zgjedhjet e tyre profesionale, të ndjekin pasionin apo të kërkojnë një pagë më të larta? Xhihani theksoi se tregu i punës po përballet me një disbalancë të dukshme midis vendeve të punës që ofrohen dhe aspiratave të të rinjve. Sipas tij, kjo përplasje vjen si pasojè e mospërputhjes midis ofertës dhe kërkesës në tregun e punës.
“Të rinjtë po përballen me dilema të vështira për sa i përket karrierës së tyre. Në bazë të publikimeve të tremujorit të fundit të 2024, niveli i papunësisë tek të rinjtë është shumë i lartë në krahasim me nivelet e papunësisë në vendet e tjera,” u shpreh ai.
Një ndër faktorët kryesorë që ndikojnë në këtë situatë, sipas Xhihanit, është fakti që të rinjtë nuk gjejnë veten në pozicionet e punës që kërkohen nga punëdhënësit.
“Kjo mund të jetë problematike sidomos në vendet ku ka pasur vështirësi në organizimin e arsimit, qoftë profesional apo universitar, ne përputhje me kërkesat reale të tregut të punës,” shtoi ai.
Dilema mes pasionit dhe pagës mbetet një çështje e hapur për shumë të rinj, të cilët ndihen të pasigurt për të ardhmen e tyre profesionale. Ekspertët e punësimit sugjerojnë që të rinjtë të orientohen drejt fushave që ofrojnë më shumë mundësi dhe të përgatiten për sfidat e tregut të punës përmes trajnimeve dhe specializimeve. /Alsat.mk
