E martë, 08 Nentor 2016 – Sakte.net /
Interesimi për t’u regjistruar në arsimin e lartë në Kosovë është shumëfishuar në dekadën e fundit. Kjo dëshmohet me faktin se mbi 11 mijë studentë diplomojnë brenda viti.
Por, shqetësim mbetet gjetja e një vendi të punës.
Syzanë Bunjaku është një nga ish-studentet e UP-së e cila ka studiuar në degën e Gazetarisë dhe Ekonomisë. Ajo në një intervistë për emisionin “Ekonomia me Erëzën” të transmetuar në KTV, ka thënë se mungesa e praktikës gjatë studimeve, ka bërë që të ketë vështirësi në tregun e punës, duke vënë në pikëpyetje se çka po prodhon UP-ja.
“Pikërisht është mungesa e praktikës gjatë tri viteve universitare arsyeja pse ne kemi vështirësi që të futemi në treg të punës. Duke e parë se tregu i punës këtu tek ne është i kufizuar, kjo na bën të ndihemi të papërgatitur nga ana praktike dhe të pyesim çka po prodhon UP-ja. E që në të vërtetë po krijojnë letra”, është shprehur Bunjaku, raporton Koha.net.
Ndërsa, njohësi i arsimit, Dukagjin Pupovci theksoi faktin se përpos përgatitjes praktike në UP, mungon edhe ana teorike.
“Problemi është te përgatitja teorike, por edhe të puna praktike, dhe në arsimin publik kjo është pasojë e një përpjesëtimi të pavolitshëm në mes numrit të studentëve me atë të mësimdhënësve”, tha Pupovci.
Ata që vuajnë pasojat e mungesës së kuadrove, janë punëdhënësit. Alba Krasniqi nga “Trepharm”, ka deklaruar se i duhet t’i trajnojë punëtorët e rinj, për shkak të mungesës së anës praktike.
“Duke pasur parasysh që “Trepharm” vazhdimisht ka nevojë për kuadro të reja, ne organizojmë trajnime 3 mujore, kjo pasi që studentët vijnë të papërgatitur nga ana teorike”, deklaroi Krasniqi.
