Gazetare: Ajnur Bafqari
Me qëllim diagnostikimin e hershëm të sëmundjeve të rralla tek pacientët, Shoqata e mjekëve të përgjithshëm dhe ajo e personave me sëmundje të rralla nënshkruan memorandum bashkëpunimi, shkruan Alsat.
Synohet shkëmbimi i informacioneve dhe njohja e mjekëve amë me sëmundjet e rralla.
“Këto sëmundje zbulohen në fazë të vonshme, kur është vonë dhe barnat nuk mund të ndikojnë në mënyrën e duhur. Së bashku do të tentojmë që përmes kontakteve me mjekët amë dhe aktivistët e shoqatës “Jetë me sfida” mjekët të njihen nga afër me sëmundjen, por të gjejmë edhe konkluzione të përbashkëta, të veprojmë para autoriteteve kompetente, para Ministrisë e Shëndetësisë, që mjekëve amë t’u zgjidhen duart dhe të marrin numër më të madh të kompetencave, që të munden më herët t’i zbulojnë, ta bëjnë skriningun e pacientëve me sëmundje të rralla”, tha Dragan Georgievski, Kryetar i Shoqatës së mjekëve të përgjithshëm dhe familjarë.
Nga Shoqata “Jetë me Sfida” thonë se një tregues se sëmundjet e rralla nuk diagnostikohen në kohë është edhe fakti që për disa vite nuk ka pacientë të rinj me disa sëmundje të rralla.
“Kemi hasur se në 15 vitet e fundit nuk ka më pacientë me disa sëmundje, e kjo për ne është e çuditshme, sepse e dimë që janë gjenetike dhe se transferohen tek familjarët dhe e kemi kuptuar se ndoshta është ide e mirë që të bashkëpunojmë me mjekët e përgjithshëm dhe familjarë”, u shpreh Vesna Aleksovska, Kryetare e Shoqatës “Jetë me sfida”.
Fushata do të nis nga Shkupi, në fillim të muajit mars, ndërsa më pas do të zhvillohen takime me mjekët amë në të gjitha qytetet tjera të vendit/ Alsat.mk
