Marrëveshja për normalizimin e marrëdhënieve është vendi i vetëm i takimit i palëve të konfrontuara, Serbisë dhe Kosovës, ka deklaruar për agjencinë serbe të lajmeve FoNet Predrag Milidrag, bashkëpunëtor i lartë shkencor në Institutin për filozofi.
Ai e ka hedhur poshtë konfliktin e ngrirë si zgjidhje.
“Asgjë nuk na garanton se shtyrja e zgjidhjes për kohë të ardhshme do t’i sjellë ndonjë gjë Serbisë, ndërsa pozita e serbëve, sidomos e atyre në jug të Ibrit, do të jetë gjithnjë e më e keqe”, ka thënë ai.
Sipas tij, propozuesit e shtyrjes së zgjidhjes që janë të bindur se Kina e Rusia do ta shtojnë ndihmën për Serbinë, nuk ofrojnë elemente shtesë, sidomos si do të shfrytëzohej kjo kohë e shtyrjes për bashkësinë serbe në Kosovë.
Ai ka shfaqur drojën se po u fut kjo çështje në luftën e re të ftohtë ndërmjet dy superfuqive, atëherë as Serbinë dhe as Kosovën nuk do ta pyesë askush për asgjë.
Milidrag nuk sheh pse pranimi i Kosovës në Organizatën e Kombeve të Bashkuara do të ishte problem nëse arrihet marrëveshja për normalizim marrëdhëniesh që do të garantohej, në radhë të parë, nga SHBA-ja, Bashkimi Europian dhe Gjermania si përkrahës të Kosovës.
© KOHA
