Gazetar: Angell Dimovski
Me fishkëllima, parulla dhe mesazh të qartë, sindikatat dhe punëtorët në rrugë shënuan Ditën e punës. Ata kërkojnë pagë minimale prej 500 euro, rritje të të gjitha pagave të tjera për 100 euro si dhe kushte më të mira pune, shkruan Alsat.
Kryetari i LSM-së, Sllobodan Trendafillov, kërkoi rritjen e pagës minimale në 500 euro dhe të gjitha pagave të tjera me 100 euro të tjera, por nëse ato nuk rriten, të gjithë zyrtarët duhet të vendosen në pagë minimale.
“Është për të ardhur keq që ata gëzojnë privilegje me rritje të pagave prej 79 për qind, transport më të lartë se paga minimale, bufe parlamentare më të lirë se mensë për punëtorë. Këta refuzojnë të miratojnë ndryshimet në ligjin për pagën minimale, për rritje në 500 euro dhe rritje shtesë prej 100 euro në pagat e të gjithë punëtorëve të tjerë, në mënyrë që punëtorët dhe deputetët të kenë të drejtë për transport dhe ushqim”, tha Sllobodan Trendafillov – LSM.
Për t’u treguar atyre se si duket kur u kthejnë shpinën, sindikatat dhe punëtorët i kthyen shpinën Qeverisë
Ata u drejtuan drejt Odës ekonomike ku kërkuan që shefat të rrisnin pagat dhe t’u tregojnë se punëtorët largohen jashtë vendit për shkak të asaj që ata e quajnë pagë të mjerueshme.
“Këta njerëz pas meje, do ta korrigjoj kolegun tim, nuk janë punëdhënës, këta janë shefa pa shtyllë kurrizore, të cilët na kanë pirë gjakun me pambuk për 30 vjet dhe për të cilët 500 euro janë shumë për ne kurse në Greqi 5000 euro për një fundjavë nuk janë të mjaftueshme. Kjo nuk duhet të jetë një ditë, duhet të jemi këtu në rrugë çdo ditë derisa të na rrisin pagat. Kjo është për të gjitha familjet që u larguan nga ne për të kërkuar bukë jashtë vendit, Maqedonia ishte dhe do të jetë frytdhënëse vetëm me ju dhe vetëm me punëtorin, ne krijuam kapitalin e tyre, ne kemi pjesë dhe të drejtë për atë kapital”, u shpreh Ivan Peshevski – LSM.
Ata porositën Qeverinë se pa punëtorë, nuk ka ekonomi, nuk ka zhvillim dhe nuk ka të ardhme, duke kërkuar paga të mira.
“Kjo qeveri premtoi të ishte në anën e punëtorit, sot jo vetëm që hesht, por edhe na sulmon kur kërkojmë paga më të larta, por ta kenë të qartë. Ne nuk kemi frikë nga sulmet e tyre, nuk kemi frikë nga gënjeshtrat e tyre dhe konferencat e tyre për shtyp plot manipulime, asgjë që bëjnë nuk do të na ndalë dhe ne do të vazhdojmë përpara”, theksoi Trpe Deanoski – Spogj.
Kristina Ampeva tha se sot janë këtu për t’u thënë të gjithë zyrtarëve që marrin rritje page prej 79 përqind, shpenzime udhëtimi dhe kanë automjete zyrtare, rritje page prej 1.800 denarë nuk është e mjaftueshme.
“Ne u bëmë vendi me inflacionin më të lartë që i gëlltiti pagat, u bëmë vendi me shkallën më të ulët të rritjes ekonomike, u bëmë vendi me pagat më të ulëta. Të gjitha vendet e rajonit, të gjitha autoritetet e kuptuan se kjo ishte e vetmja mënyrë për të rritur pagat”, tha Kristina Ampeva – “Tekstil-punues i zëshëm”.
Megjithatë, jo të gjitha sindikatat ishin të pranishme në protestë. Konfederata e Sindikatave të Lira nuk mori pjesë, sepse siç shpjegoi dje kryetari Bllagoja Rallpovski, ai beson se në vend ka dialog të mirë social dhe se problemet zgjidhen gjithmonë në tryezë./ Alsat.mk
