Dorasi i 6 të rinjve në Pejë, tash mercenar paramilitar i Putinit

“Njëri nga vrasësit e 6 të rinjve serbë, më 14 dhjetor të vitit 1998, jeton aktualisht në Rusi. Ai është një nga ish-bashkëpunëtorët e kriminelit të luftës Arkan, kurse në Rusi gjendet që nga vitit 2014, kur iu bashkua luftëtarëve separatistë rusë në Krime të Ukrainës në cilësinë e mercenarit. Ai është Davor Saviçiq, pjesë e grupeve famëkeqe paramilitare ‘Tigrat e Arkanit’ dhe atij rus ‘Wagner’, i cili është aktiv edhe sot nëpër vende ku Putini krijon konflikte”, ka thënë në kushte anonimiteti (për arsye sigurie) një gazetar nga Beogradi për Kosovapress.

Sipas gazetarit në fjalë, këtë fakt e dinë strukturat politike dhe ato të sigurisë në Serbi, gjithashtu edhe disa gazetarë, por nuk po e bëjnë publike.

“Autoritetet serbe e dinë edhe vrasësin tjetër që ka qenë me Saviçiçin, por presin që këtë ta bëjnë publike në një kohë të caktuar. Kjo do të konsiderohej si tregti e Vuçiqit karshi presionit për zbardhjen e vrasjes së tre shqiptaro-amerikanëve, vëllezërve Bytyqi”, ka deklaruar gazetari serb.

Burimi i Kosovapress, ka siguruar edhe një pjesë të komunikimit të kolegëve të tij serbë me Davor Saviçiçin, lidhur me akuzat që bien mbi të për rastin PANDA. Komunikimi është në gjuhën serbe, përkatësisht në Messenger të facebookut (foto në fillim).

“Informatat i kemi marrë nga shërbimet e autorizuara që merren me këtë çështje. Siç jam në dijeni, autoritetet në Beograd tashmë kanë pranuar dosjen tuaj dhe planifikojnë që ta aktivizojnë kur t’iu ngushtohet puna me rastin tjetër – rastin e vrasjes së vëllezërve Bytyqi. Ngaqë nuk do të munden që ta përmbushin këtë kërkesë, rasti PANDA do aktivizohet në stilin ‘Ja kemi diçka tjetër’. Gjithashtu, siç unë e di, informatat tashmë i janë shpërndarë disa gazetarëve rusë dhe ukrainas. Unë, i kam parë dokumentet dhe dëshmitë”, thuhet ndër të tjera në komunikimin që ka pasur gazetarja serbe me Saviçiçin.

Vet mediat serbe, siç është “Kurir” (në vitin 2014), kishin shkruar se “Ish-kreu i Sigurimit të Shtetit (Drzavna Bezbednost), Radomir Markovic, iu ka ofruar kompetentëve shtetëror prova se sulmi në kefeterinë PANDA është bërë nën organizimin e Milorad Ulemek – Legija”.

Të dhënat nga media të tjera, thonë se Davor Saviçiçi ka qenë pjesë e Njësisë për Operacione Speciale (JSO), të cilën e ka udhëhequr njëherë Arkani e më pas Legija.

Natasha Kandiç, aktivistja serbe për të drejtat e njeriut, në vitin 2014, kishte deklaruar për Radion Evropa e Lirë, se selia e ish-Beretave të kuqe, gjegjësisht, njësiteve për Operacione Speciale ka qenë në pushimoret që gjendet afër Manastirit të Deçanit.

“Ata, me automjetet e tyre ‘hamer’ në vazhdimësi janë vozitur nëpër rrugët e Pejës. Ka qenë njësia lokale ‘Vetëtima’… Kjo ka ngjallur frikë të tmerrshme në qytet. Pas orës 16, asnjë shqiptar nuk ishte nëpër rrugë. Flitej se për këtë vepronte ‘Dora e zezë’ dhe se njerëzit zhdukeshin dhe se automjetet shëtisnin pa tabela regjistrimi”, kishte deklaruar Natasha Kandiç.

Vet burime qeveritare të Serbisë, kishin deklaruar për mediet serbe se, qëllimi i këtij krimi ishte që Ushtria Çlirimtare e Kosovës të paraqitej si terroriste në sytë e ndërkombëtarëve.

Rasti PANDA nuk është zbardhur deri më tash, as nga institucionet e Republikës së Kosovës, e as nuk ka pasur gatishmëri nga Serbia që të zbardhet. Megjithëse kreu i Serbisë, Aleksandar Vuçiç, pati deklaruar se vrasjen e 6-fishtë në PANDA nuk e kanë bërë as shqiptarët e as të huajt (perëndimorët), deri tani asgjë nuk është bërë më shumë.

Pankarta me viktimat serbe, ku akuzoheshin “terroristët shqiptarë” për vrasje

Më 14 dhjetor 1998, në mes të luftës në Kosovë, dy meshkuj të maskuar kishin hyrë në kafeterinë “Panda” në Pejë, ku si pasojë e shtirjes me armë automatike, kishin vrarë 5 nxënës të shkollës së mesme: Ivan Obradoviç (14), Zoran Stanojeviç (18), Svetislav Ristiç (17), Dragan Trifoviç (17) i Vukosav Gvozdenoviç (17) dhe studentin Ivan Radeviç (25). Kafeteria “Panda” gjendej matanë rrugës së gjimnazit në Pejë.

Menjëherë pas rastit, autoritetet okupuese policore serbe në Kosovë, montuan vrasjen, duke ia mveshur akuzën UÇK-së, me ç’rast arrestuan dhe torturuan qytetarët Xhevdet Bajramin, Beqir Loxhën, Gazmend Bajramin, Vllaznim Përgjegjajn, Behar Bajrin dhe Agron Kollçakun.

Eksperti i sigurisë Agim Musliu, për Kosovapress ka thënë se, përveç faktit se paramilitarët e Arkanit dhe Legijas kanë operuar në të gjithë Kosovën, ka edhe një tregues shumë të madh se PANDA-n e kanë realizuar vet serbët, dhe ai është RTS.

“Televizioni i Serbisë (RTS), disa ditë para se vrasje në PANDA të realizohej kishte transmetuar në mënyrë jo të zakonshme një ‘komunikatë’ të fabrikuar të UÇK-së, ku gjoja thuhej se, do të sulmohen kafeteritë në të cilat rrinë të rinj serbë”, ka thënë Musliu.

“Për ta përforcuar edhe më tej këtë tregues”, vazhdon Musliu, “organet e sigurisë së Serbisë, nuk e ndërmorrën atëherë asnjë masë për t’i mbyllur këto kafeteri, gjë që lë hapësirë gjykimi për të konstatuar se e kanë kryer vet. Në të kundërtën, sikur të ishte e vërtetë që UÇK-ja ka lëshuar një komunikatë të tillë, ata do t’i merrnin të gjitha masat e sigurisë”, ka konstatuar ai.

Dorasi Saviçiç, tash paramilitar i Putinit

Sipas medias ruse “Fontanka”, Davor Saviçiq është udhëheqës i njësitit serb brenda grupit paramilitar rus “Wagner” dhe ka marrë pjesë në luftime në Ukrainë dhe Siri. Saviçiç është i njohur me nofkën “Ujku” (rusisht “Volk” apo serbisht “Vuk”). Ndër të tjera, ai mbahet përgjegjës edhe për pjesëmarrje në një masakër ndaj një qytetari sirian, i cili është torturuar deri në vdekje, e më pas i është hequr koka dhe trupi i është djegur. Kjo ngjarje është filmuar me telefon nga vet kriminelët e grupit “Wagner”. Ndër të tjera, aty dëgjohet duke u thirrur edhe nofka e Saviçiçit. Videoja ka pamje shumë të rënda dhe nuk preferohet të shihet nga ata që e kanë shëndetin e lig dhe të miturit.

Disa media ruse më liberale, siç është edhe “Novaya Gazeta” thotë se burrat në videot e rrjedhura i drejtohen njëri-tjetrit me nofkat “Pamir” (një varg malesh në Azinë Qendrore) dhe “Volk” (ujku). Gazetarët kanë thënë se mercenari serb Davor Saviçiç ka nofkën “Volk”, por pamjet nuk e bëjnë të qartë nëse ai është një nga burrat që ndihmoi në masakër.

Krimineli Saviçiç në uniformën kishtare ortodokse

Eksperti i sigurisë, Agim Musliu ka thënë se, bashkëpunimi i paramilitarëve të Arkanit me rusët është bashkëpunimi më i madh luftarak.

“As vet institucionet shtetërore, në këtë rast Rusia dhe Serbia, nuk kanë bashkëpunim të kaq të mirë, siç kanë paramilitarët serbë të luftërave në ish-Jugosllavisë me oligarkët e Putinit. Përveç këtij Saviçiçit, edhe kumbara i Arkanit Goran Gerovac, ka qenë pjesë e luftës në Krimenë e pushtuar nga rusët. Shërbimi i inteligjencës ukrainase i ka publikuar të gjithë këta emra, dhe i ka kërkuar Serbisë që t’i ndiqte, por Vuçiçi nuk ka bërë asgjë deri tash”, ka thënë Musliu.

Davor Saviçiçi është serb i lindur në Bosnjë dhe Hercegovinë. Emri i tij gjendet në internet si kriminel lufte në ish-Jugosllavi dhe tash me forcat e paramilitarëve të Putinit në disa vende, Siri dhe Ukrainë.

Musliu ka thënë se, gjatë luftës në Kosovë Saviçiç ka qenë i njohur me nofkën ELVIS.

“Ka zëra serbë që thonë që së bashku me Saviçiçin, vrasjen në kafeterinë PANDA e ka bërë edhe një serb paramilitar nga Peja. Ai quhet Zoran Stevançeviç, i cili iu ka bashkëngjitur njerëzve të Arkanit në vitin 1998”, ka deklaruar Musliu për Kosovapress.

Ai më tej shton se, të dhëna për Saviçiçin gjenden gjithandej në ‘open sources’, mirëpo tashmë Kosova duhet të bëjë presion më shumë te bashkësia ndërkombëtare dhe vet Serbia që Saviçiçi t’i dorëzohet si kriminel lufte Kosovës, pavarësisht se ai gjendet në Rusi dhe thotë se merret me ndërtim./KP/