Ministri i Ekonomisë dhe Punës, Besar Durmishi, ka bërë të ditur sot se ka nënshkruar dhe shpallur vendimin e qeverisë për harmonizimin e pagës minimale, për të shmangur bllokimin e pagesës së rrogave. Durmishi shtoi se këtë vendim e ka marrë, edhe pse nuk ka pasur pëlqim nga Këshilli Ekonomiko Social, i cili është i detyrueshëm me ligj.
“Pas vendimit të Qeverisë, unë si ministër i Ekonomisë dhe Punës e shpalla pagën minimale. Nuk ka pëlqim nga Këshilli Ekonomik dhe Social, sepse nuk ka përfaqësim nga sindikatat. Megjithatë, sipas ligjit që është në fuqi dhe i cili është nënshkruar nga sindikatat dhe punëdhënësit, me vendimin e Qeverisë jam i obliguar ta shpall pagën minimale para 31 marsit. Nga ajo llogaritet paga mesatare dhe të tjerat, nëse nuk do ta kishim shpallur deri më 31 mars, i gjithë vendi dhe të gjitha institucionet do të ishin bllokuar dhe sektori privat nuk do të mund të llogariste pagat për punonjësit e tyre”, deklaroi Besar Durmishi – Ministër i Ekonomisë. /Alsat.mk