Jetmir Bakija nga organizata joqeveritare Demokracia Plus, ka komentuar situatën politike dhe takimet mes Lëvizjes Vetëvendosje dhe Lidhjes Demokratike drejt arritjes së një koalicioni qeverisës.
Bakija ka thënë se marrëveshje e koalicionit që përfshin postin e presidentin nga LDK apo LVV e rrezikon qëndrueshmërinë e Qeverisë mes këtyre dy partive.
Ai ka thënë se edhe nëse marrëveshja LVV-LDK përfshin kandidaturën e LDK-së për president, qeveria e re mund të rrëzohet pas një viti.
“Ta zëmë marrëveshja LVV-LDK po përfshin kandidaturën e LDK-së për President. Mirëpo, nëse nuk janë të pranishëm së paku 80 deputet në seancën e Kuvendit për votimin e Presidentit siç e kërkon vendimi i Gjykatës Kushtetuese (vendimi që e kishte rrëzu President Pacollin në 2011) a do ta rrëzonte atëherë LDK qeverinë LVV-LDK? Me siguri se po e njëjtë do të vepronte edhe LVV në atë rast. Pra pas, diku një viti do të rrezikohej rënia e qeverisës së re”, ka shkruar Bakija në një shkrim të bërë në Facebook.
Bakija ka përmendur dy opsione se si mund të pajtohen LVV dhe LDK për postin e presidentit.
“Andaj janë dy opsione për President nëse e keni përnjëmend qeverisjen bashkë: 1. Boni Qeverinë e ndryshoni Kushtetutën që me zgjedh Presidentin nga populli ose 2. Pajtohuni që kur vjen koha, me e gjet një kandidatë të pavarur që është i pranueshëm edhe për një pjesë të opozitës”, vijon shkrimi i tij.
Ndryshe, LVV dhe LDK deri tani kanë zhvilluar një sërë takimesh ku kanë harmonizuar shumicën e programeve qeverisës, mirëpo siç kanë thënë nga LVV, LDK po e kushtëzon arritjen e marrëveshjes me postin e presidentit.
