Themeluesi i “OnlyFans”, e cila njihet për përmbajtje pornografike, Tim Stokley, ka paraqitur një propozim për blerjen e TikTok, mes presionit nga qeveria Trump për të ndarë platformën nga kompania kineze ByteDance.
Propozimi, sipas Reuters, është paraqitur përmes startup-it të tij të ri, Zoop, në bashkëpunim me kompaninë e kriptomonedhave “The Hbar Foundation”.
Në të njëjtën kohë, edhe Amazon ka hyrë zyrtarisht në konkurrencë, duke paraqitur një propozim blerjeje, përmes një letre drejtuar Zëvendëspresidentit të SHBA, Jay D. Vance, dhe Ministrit të Tregtisë, Howard Latnick, sipas New York Times.
Një burim ka konfirmuar ekzistencën e ofertës për Independent, ndonëse Amazon ka refuzuar të komentojë për këtë çështje.
Sipas mediave ndërkombëtare, ata që janë të përfshirë në negociata nuk duket se e marrin seriozisht propozimin e Zoop. Amazon dhe kompani të tjera të mëdha mbeten favoritë, ndërkohë që qeveria e SHBA po përgatitet të marrë vendime të rëndësishme për të ardhmen e platformës.
Afati i caktuar nga Presidenti Trump për dorëzimin e propozimeve përfundon të shtunën, më 5 prill, pas një dekreti ekzekutiv që ai nënshkroi në ditën e tij të parë në Shtëpinë e Bardhë, duke i dhënë një periudhë 75-ditore për të vendosur për fatin e aplikacionit.
Gjykata e Lartë kishte miratuar më parë ligjin që kërkonte ndarjen e TikTok nga ByteDance ose ndalimin e tij në SHBA, për arsye të sigurisë kombëtare.
Në tryezë për aplikacionin popullor janë tashmë investitorë të mëdhenj, si Blackstone dhe Oracle.
