Një 49-vjeçar i identifikuar si Sokol Bushkolaj është arrestuar nga policia në lidhje me aktet e dhunshme të ushtruara gjatë protestës së ditës së djeshme të organizuar nga Aleanca për Mbrojtjen e Teatrit dhe opozita.
Mësohet se kjo ishte hera e dytë që 49-vjeçari është arrestuar nga efektivët e policisë pasi është ndaluar dhe më parë në lidhje me protestën e datës 07 maj 2024.
Gjithashtu u procedua në gjendje të lirë dhe shtetasi me iniciale K. B., 22 vjeç, banues në Tiranë.
Njoftimi i policisë
Drejtoria Vendore e Policisë Tiranë, në lidhje me aktet e dhunshme të ushtruara gjatë protestës së zhvilluar më datë 28.05.2024, përpara Bashkisë Tiranë, nga Aleanca për Mbrojtjen e Teatrit, në vijim të veprimeve hetimore e procedurale dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndaloi shtetasin:
– S. B., 49 vjeç, banues në Thumanë, për veprat penale “Prishja e qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr”, “Goditjet për shkak të detyrës” dhe “Vrasja me dashje” mbetur në tentativë. Ky shtetas është ndaluar dhe më datë 08 maj, në lidhje me protestën e datës 07 maj 2024.
Gjithashtu u procedua në gjendje të lirë shtetasi K. B., 22 vjeç, banues në Tiranë.
Materialet i kaluan Prokurorisë për veprime të mëtejshme.
