Kryekomisioneri Ilirian Celibashi, ka shkuar për monitorim në KZAZ-në 30 në zonë e Kasharit, ku ditën e sotme u dhunua një nga sekretarët.
Gjithashtu, sipas pamjeve të siguruara nga Klodiana Lala, brenda rrethimit të shkollës ku ndodhet kjo KZAZ është parë edhe një automjet i parkuar, në kroskotin e të cilit ndodhej një kuletë me një shumë të konsiderueshme parash.
Burime bëjnë me dije se lidhur me incidentin e sotëm janë shoqëruar dy persona, të cilët dhunuan sekretarin Remzi Mehmeti.
Njëri prej tyre, sipas policisë është 26-vjeçari Rei Nozlli, ndërsa indentiteti i personit tjetër nuk është bërë ende i ditur.
Sipas burimeve, Nozlli, vëzhgues i Ornaldo Rakipit, goditi me grusht sekretarin e KZAZ-së, çka ka sjellë ndërhyrjen e menjëhershme të forcave të rendit. Pas ngjarjes, ai është shoqëruar në komisariat për t’u marrë në pyetje dhe për të sqaruar rrethanat e konfliktit.
Ngjarja ndodhi në prani të komisionerëve dhe vëzhguesve të tjerë, duke krijuar tension dhe ndërprerje të menjëhershme të numërimit të votave.
