Një rast i kultivimit të bimëve narkotike është goditur nga Policia e Gramshit në kuadër të planit operacional “Koordinata”.
Pas një hetimi njëmujor të ndjekur me metoda proaktive, është finalizuar operacioni policor i koduar “Survejimi”, gjatë të cilit u arrestua në flagrancë 63-vjeçari M. H., banues në fshatin Grazhdan, ndërsa i biri, 33-vjeçari A. H., banues në Tiranë, është shpallur në kërkim.
M. H. u kap teksa kujdesej për 35 bimë narkotike të llojit Cannabis Sativa, të kultivuara në një zonë pyjore pranë banesës së tij.
Gjatë kontrollit në banesë, policia sekuestroi edhe 2 armë gjahu, 2 radio që imitojnë pajisjet e Policisë, si dhe 60 fishekë të kalibrave të ndryshëm, që mbaheshin pa leje.
Sipas hetimeve, dyshohet se edhe i biri i të arrestuarit ka bashkëpunuar në këtë veprimtari kriminale dhe po punohet për lokalizimin dhe arrestimin e tij.
Materialet procedurale i kaluan Prokurorisë së Elbasanit për veprat penale të lidhura me drogën dhe armëmbajtjen pa leje.
Njoftimi i policisë:
Gramsh/Vijon plani operacional policor, antikanabis, i koduar “Koordinata”.
Në kuadër të tij, si rezultat i një hetimi njëmujor, me metoda proaktive, u finalizua operacioni policor i koduar “Survejimi”.
Arrestohet një shtetas që u kap duke u kujdesur për bimët narkotike që kishte kultivuar në pyllin e fshatit Grazhdan.
Në banesën e tij, në afërsi të sipërfaqes së mbjellë, ai mbante pa leje, 2 armë gjahu, 2 radio si të Policisë dhe fishekë luftarak të kalibrave të ndryshëm.
Shpallet në kërkim djali i të arrestuarit, mbi dyshime për përfshirje në veprimtarinë kriminale të kultivimit të bimëve narkotike.
Asgjësohen bimët narkotike dhe sekuestrohen armët, radiot dhe municioni.
Si rezultat i një hetimi njëmujor, të ndjekur me metoda proaktive, në bashkëpunim me Prokurorinë e Elbasanit, kundër veprimtarisë kriminale të kultivimit të bimëve narkotike, shërbimet e Komisariatit të Policisë Gramsh finalizuan operacionin policor të koduar “Survejimi”.
Gjatë operacionit u arrestua në flagrancë, teksa kujdesej për 35 bimët narkotike që kishte kultivuar në pyllin e fshatit ku banonte, shtetasi M. H., 63 vjeç.
Më tej, gjatë operacionit u krye kontroll në banesën e këtij shtetasi, ku u gjetën 2 armë gjahu, 2 radio si të Policisë dhe 60 fishekë të kalibrave të ndryshëm, që posedoheshin pa leje.
Gjithashtu, në lidhje me këtë rast u shpall në kërkim shtetasi A. H., 33 vjeç, banues në Tiranë, pasi nga hetimet dyshohet se ka bashkëpunuar me babanë e tij, shtetasin M. H., për kultivimin e bimëve narkotike. Punohet për kapjen e 33-vjeçarit.
Materialet procedurale iu referuan Prokurorisë së Elbasanit, për veprat penale “Kultivimi i bimëve narkotike”, “Prodhimi dhe mbajtja pa leje e armëve luftarake dhe municionit”, “Prodhimi dhe mbajtja pa leje e armëve të gjuetisë dhe sportive” dhe “Mbajtja pa të drejtë e uniformës”.
