Haradinaj, i njoftoi parlamentarët me progresin e Kosovës, përkushtimin e Qeverisë së Kosovës për zhvillim ekonomik, tërheqjen e investitorëve të huaj, hapjen e vendeve të reja të punës dhe rrugën euroatlantike të saj, duke theksuar se Kosova është e interesuar të zgjeroj partneritetin ekonomik.
“Grupet e miqësisë së mirë në Parlamentet tona, janë bazë e mirë për kultivimin e raporteve të mira dhe partneritetit me Britaninë e Madhe”, tha Haradinaj, duke theksuar se bashkëpunimi i mirë me Qeverinë e Kosovës e siguron stabilitetin politik mes të dyja vendeve.
Duke folur për lëvizjen e lirë të qytetarëve të Kosovës dhe duke kërkuar mbështetjen për liberalizmin e vizave, Haradinaj u ka thënë parlamentarëve nga Mbretëria e Bashkuar se me liberalizimin e vizave vendet perëndimore do të kenë më shumë ekonomi dhe më shumë këmbime.
“Mbështetja e Mbretërisë së Bashkuar në momentet vendimtare ka qenë shumë e rëndësishme për Kosovën, prandaj populli dhe Republika e Kosovës u janë mirënjohës”, tha Haradinaj, duke kërkuar edhe më tej mbështetjen e shtetit britanik për anëtarësimin e Kosovës në organizata ndërkombëtare dhe thellimin e bashkëpunimit në rrafshin ekonomik dhe politik.
Gjatë takimit, Haradinaj ka folur edhe për mundësinë e zgjerimit të bashkëpunimit ndërmjet bizneseve angleze dhe atyre që udhëhiqen nga diaspora shqiptare në Mbretërinë e Bashkuar.
Haradinaj, tha po ashtu se në Kosovë janë krijuar parakushte për tërheqjen e investimeve të huaja direkte, është aprovuar Ligji për Investime Strategjike, janë krijuar zona të lira ekonomike me infrastrukturë të gatshme si dhe janë krijuar lehtësira tatimore për bizneset. Në këtë drejtim, kryeministri Haradinaj inkurajoi investitorët e huaj të sjellin investimet e tyre në Kosovë.
Anëtarët e grupit të miqësisë parlamentare Kosovë – Mbretëri e Bashkuar, vlerësuan progresin e Kosovës që nga shpallja e pavarësisë, duke thënë se do të jenë përkrahës të të gjitha proceseve në Kosovë.
