Drejtori i Ndërmarrjes Publike “Higjiena Komunale – Shkup”, Sabahudin Rustemi pretendon se Komuna e Çairit ka borxh total prej mbi 7 milionë denarësh ndaj kompanisë që ai menaxhon, që, siç thotë ai, përfshin edhe detyrime financiare të papaguara nga institucionet komunale, duke përfshirë vetë objektet komunale, shkollat fillore dhe çerdhet që janë nën juridiksionin e Komunës së Çairit.
“Aktivitetet për pastrimin dhe mirëmbajtjen e higjienës publike në territorin e Komunës së Çairit kryhen rregullisht dhe në përputhje me Planin Operativ të miratuar nga Këshilli i Qytetit të Shkupit. Kryetari i Komunës së Çairit, Visar Ganiu, me deklarata që aludojnë në gjoja mospërmbushje të detyrimeve nga Ndërmarrja Publik, synon të shkëpusë vëmendjen nga problemet reale që po krijon vetë. Ganiu duhet të merret seriozisht me borxhin prej 7 milionë denarësh që Komuna e Çairit ka ndaj Ndërmarrjes Publike Higjiena Komunale Shkup, i cili është grumbulluar që nga momenti që ai mbajti postin e kryetarit të Komunës së Çairit”, thotë Rustemi.
Ai thekson se Komuna e Çairit është vazhdimisht dhe institucionalisht e informuar për ekzistencën e këtij borxhi, por ende nuk ka ndërmarrë ndonjë hap konkret për ta zgjidhur atë.
“Edhe pse nuk i ka paguar detyrimet e tij me vite, kjo nuk na pengon punën, por ndikon drejtpërdrejt në qëndrueshmërinë dhe cilësinë e shërbimeve që u ofrojmë qytetarëve”, thotë drejtori i Ndërmarrjes Publike “Higjiena Komunale – Shkup”.
