Lideri i Partisë Liberale të Serbisë, Çedomir Jovanoviq, ka pasur një përplasje të ashpër me historianin, Sasha Adamoviq. Jovanoviq ka thënë se Serbia e ka humbur luftën dhe Kosova është e pavarur.
Jovanoviq dhe Adamoviq në TV “Pink” kanë debatuar për luftërat në ish-Jugosllavi, pavarësinë e Kosovës dhe vrasjet politike në Serbi.
“Ju mua po më thoni se unë kam pranua pavarësinë e Kosovës. Kjo ka ndodhur. Kosova është e pavarur nga Serbia”, ka thënë Jovanoviq.
Ai e ka pyetur historianin serb se “sikur tash sërish të na jepnin Kosovën, ju nuk do ta dërgonit djalin tuaj në kufi?”
“Ne kemi luftuar dhe e kemi humbur luftën. Kush është për këtë përgjegjës. Kush e futi popullin në luftë me NATO-n”, ka pyetur Jovanoviq.
Debati u ashpërsua kur historiani Adamoviq e konsideronte Sllobodan Millosheviqin të pafajshëm.
Jovanoviq iu është drejtuar Sasha Adamoviq duke i thënë se ”po i përkrah dhe respekton kriminelët, siç janë Millosheviq e Karaxhiq”.
Jovanoviq i ka thënë historianit serb se duhet të turpërohet nga ajo që thotë.
“Kush vrau nëpër Serbi. Kush e vrau Ivan Stamboliqin. Kush e vrau Zoran Gjingjiqin?”, ka pyetur Jovanoviq, duke akuzuar historianin se po arsyeton krimin, transmeton Telegrafi.
Lideri i Partisë Liberale të Serbisë, Çedomir Jovanoviq, ditë më parë vizitoi Kosovën, ku zhvilloi takime me politikanë shqiptarë të Kosovës dhe pjesëtarë të shoqërisë civile.
