Ish-Kryediplomati Skender Hyseni ka thënë se nuk do të ketë mbyllje të konfliktit ndërmjet Kosovës dhe Serbisë pa njohje reciproke. Zyrtari i LDK’së ka theksuar se në situatën sikur është tash, konflikti mbetet i hapur mes dy shteteve.
“Përderisa Kosova dhe Serbia nuk e njohin njëra tjetrën si shtete të pavarura dhe sovrane, problemet midisin këtyre dy vendeve mbeten konflikt i hapur”, është shprehur ish-Ministri i Punëve të Jashtme, Skender Hyseni për Express.
Këto komente, Hyseni i ka bërë pas deklaratave të Ministrit aktual të Punëve të Jashtme, Behgjet Pacolli, i cili ka thënë se Serbia nuk duhet domosdoshmërisht ta njohë Republikën e Kosovës.
Në një intervistë për ‘AgenziaNova’ të Italisë, Pacolli ka folur raportet me Serbinë.
“Serbia nuk duhet ta njohë domosdoshmërisht pavarësinë e Kosovës, por nuk duhet të ndalë udhëtimin e Prishtinës drejt Evropës”, thotë Pacolli.
“Ne e pranojmë Serbinë si një fakt ekzistues shumë të rëndësishëm për paqen dhe stabilitetin në Ballkan dhe e dimë që Beogradi mund të kontribuojë shumë në këtë drejtim “dhe prandaj” duhet të pranojë faktin se Kosova është shtet i pavarur“, ka shtuar ai.
Kosova dhe Serbia vazhdojnë dialogun në Bruksel të ndërmjetësuar nga BE’ja. Para vitit 1998, Kosova ishte nën pushtetin e Serbisë derisa prej vitit 2008 është Shtet i pavarur.
Zyrtarët serbë në vazhdimësi mohojnë shtetësinë e Kosovës derisa në Kushtetutën e tyre e kanë Kosova si pjesë të territorit të tyre.
Kosovën deri tash e kanë njohur më shumë se 100 shtete përfshirë Amerikën, Britaninë, Gjermaninë e Francën. Vazhdojnë të mos e njohin Rusia e Kina.
Kosova tash është në fazën e fundit të dialogut, i cili u ndërpre ditën kur u vra udhëheqësi i Iniciativës Qytetare, Oliver Ivanoviq. Zyrtarët serbë kanë paralajmëruar se dialogu nuk do të fillojë deri sa të zbardhet vrasja e Ivanoviqit. Nga ky dialog, pritet edhe njohja e ndërsjellë e Kosovës nga Serbia.
