Një 57-vjeçar shqiptar, i dënuar në Itali me 24 vite burg, është arrestuar nga policia shqiptare në Lushnje. Bëhet fjalë për Fatbardh Haxhiu, alias Bardhyl Haxhiu, i cili u vu në pranga në kuadër të operacionit të koduar “Operacionalja 42”.
Policia e Shtetit njoftoi se 57-vjeçari ishte në kërkim ndërkombëtar nga Interpol Roma, pasi Gjykata e Apelit e Napolit në vitin 2008 e ka dënuar me 24 vjet burgim. Ai akuzohet për veprën penale “Organizata kriminale me qëllim trafikimin e lëndëve narkotike”.
Haxhiu, në bashkëpunim me shtetas të tjerë shqiptarë, akuzohet për trafikimin e sasive të kokaine prej 15 – 130 kg në qytetin e Caserta, Itali.
Njoftimi i policisë:
Finalizohet nga Drejtoria e Forcës së Posaçme Operacionale, operacioni policor i koduar “Operacionalja 42”.
I dënuar nga autoritetet italiane, me 24 vjet burgim, si pjesëtar i një organizate kriminale që trafikonte lëndë narkotike, kapet në Lushnjë, 57-vjeçari.
Si rezultat i koordinimit të punës dhe shkëmbimit të informacioneve, me partnerët italianë, nëpermjet strukturave homologe Interpol Tirana dhe Interpol Roma, shërbimet e Drejtorisë së Forcës së Posaçme Operacionale, në kuadër të operacionit “Operacionalja 42”, lokalizuan në Lushnjë, kapën dhe vunë në pranga, me qëllim ekstradimin në Itali, shtetasin:
Fatbardh Haxhiu alias Bardhyl Haxhiu, 57 vjeç, banues në Lushnjë.
Ky shtetas ishte në kërkim ndërkombëtar nga Interpol Roma, pasi Gjykata e Apelit e Napolit, Itali, në vitin 2008, e ka dënuar me 24 vjet burgim, për veprën penale “Organizata kriminale me qëllim trafikimin e lëndëve narkotike”. Ky shtetas, në bashkëpunim me shtetas të tjerë shqiptarë, ka trafikuan sasi kokaine 15 – 130 kg, në Caserta, Itali.
Interpol Tirana po bashkëpunon me homologët në Romë, për të finalizuar ekstradimin e këtij shtetasi, në Itali.
