Departamenti Amerikan i Shtetit ia ka ndaluar hyrjen në territorin e SHBA-së, ish-komandantit të xhandarmërisë serbe, Goran Radosavljeviq, për përfshirjen e tij në rastin e vrasjes së vëllezërve Bytyqi. Një vendim të tillë SHBA-ja e ka marrë edhe për gruan dhe vajzën e Radosavljeviqit, transmeton Gazeta Express.
Por Radosavljeviq thotë se nuk i interesojnë vendime të tilla të Departamentit të Shtetit.
“Unë nuk dua të reagoj ndaj lajmeve të tilla, as nuk më intereson e as nuk më godet një vendim i tillë”, ka thënë Radosjavljeviq, shkruan B92.
Ai ka mohuar se ka përgjegjësi për vdekjen e vëllezërve Bytyqi.
“Në organet hetimore kam dhënë deklaratë, dhe një mijë herë unë flas në lidhje me atë”, ka thënë Radosjavljeviq.
Ish-komandanti i xhandarmërisë serbe është anëtar i Partisë së Aleksander Vuçiqit. Ai dyshohet se është i përfshirë dhe përgjegjës për vrasjen e tre anëtarëve të familjes Bytyqi në korrikun e vitit 1999.
