Genc Gjokutaj, avokati i kreut të Partisë së Lirisë, Ilir Meta, do të jetë gjithashtu i pranishëm në marrjen në pyetje të klientit të tij nga Prokurorët e Posaçëm në SPAK, lidhur me dosjen CEZ-DIA, për të cilën ish-Presidenti po hetohet.
Përfaqësuesi ligjor i Metës ka mbërritur në godinën e SPAK-ut, për të qenë i pranishëm në dhënien e dëshmisë së kreut të Partisë së Lirisë para prokurorëve të posaçëm.
Ish-Presidenti u arrestua më 21 tetor 2024 në ish-sheshin “Shqiponja” dhe ndodhet në qeli në masën e sigurimit “Arrest në burg”.
SPAK e akuzon Ilir Metën se ka ndërmarrë veprime korruptive për kontratën CEZ-DIA në kohën kur ka qenë ministër i Energjetikës gjatë qeverisjes “Berisha 2”.
Ish-Presidenti reagoi në rrjetet sociale nga qelia për marrjen në pyetje ditën e martë, duke thënë se do të jetë ai që do t’i marrë në pyetje hetuesit.
“Sapo mësova nga mediat e regjimit, që nesër unë, lideri i Partisë së Lirisë, forcës së dytë opozitare dhe forcës së tretë politike në vend, qenkam thirrur për t’u pyetur nga organizata kriminale SPAK, e cila firmosi rrëmbimin tim të paligjshëm dhe banditesk. Pa dyshim që do jem atje për t’i marrë unë në pyetje dhe pas kësaj seance jam i hapur për çdo pyetje nga mediat që do të jenë të pranishme”, shkruhet në Facebookun e Ilir Metës.
