Raportuesja e Shqipërisë për Parlamentin Europian, Isabel Santos, ka hartuar një rezolutë shumë kritike kundër vendit tonë, duke kritikuar planet për blerjet e pasaportave, mungesën e transparencës në konkurrencë dhe prokurimet publike.
Sipas Euroactiv, rezoluta e hartuar nga Santos, një socialiste ashtu si Partia Socialiste në pushtet, do t’i nënshtrohet procedurave parlamentare në javët e ardhshme.
“Parlamenti Europian shpreh shqetësimin për mungesën e progresit në arritjen e transparencës institucionale, lirisë së shprehjes dhe lirisë së medias dhe thekson rolin që kanë liderët politikë në krijimin e një mjedisi favorizues për këto liri”, thuhet në projekt-rezolutën.
Në temën e medias, draft rezoluta bën thirrje për “masa të menjëhershme” kundër ndikimit politik, strukturës ekonomike të shtypit dhe frikësimit të gazetarëve.
Në raportin e fundit të progresit të Komisionit, për Shqipërinë u tha se nuk ka bërë “asnjë përparim” në lirinë e medias, me shqetësimet kryesore që lidhen me presionin ndaj punonjësve të medias, financimin dhe transparencën.
