Izet Mexhiti në Alsat edhe zyrtarisht konfirmoi se së bashku me Bilall Kasamin do të jenë kryetarët e ardhshëm të partisë VLEN. Postet e nënkryetarit do t’u takojnë Aleancës për Shqiptarët dhe Vetëvendosjes, ndërsa sekretari i përgjithshëm do të jetë nga partia Alternativa. Vendimmarrja në partinë e re që para ca ditësh u finalizua në Kosovë, sipas Mexhitit do të bazohet në parimin e konsensualitetit.
“Jemi dakorduar rreth ideologjisë së VLEN-it, pra që do të jetë më tepër qendër e djathtë, pra është risi në skenën politike. E dyta është përzgjedhur modeli i lidershipit që është poashtu një risi, është një lloj ndryshimi, karakteristike e VLEN-it është dialogu dhe jo vendimet autokratike apo gjithçka të varet nga një person, nga një lider. E keni parasysh edhe pse është modeli i bashkëkryetarëve, prapë brenda kryesisë së ngushtë do të vendoset me konsensus ose në rast se ka ndonjë dilemë ose dallime, atëherë duhet të shkohet me shumicë absolute 4 me 1, ose dy të tretat e Kuvendit”, deklaroi Izet Mexhiti.
Sa i përket ndarjes së pushtetit brenda VLEN-it sipas formulës 5 parti nga 20%, Mexhiti theksoi se kjo do të jetë e përkohshme.
“Tash e tutje gjithë do të jemi VLEN. Pra, më tepër do të jenë kriteret në komisionin kadrovik, kualitativ, përgatitja arsimore, përgatitja profesionale dhe më pak e rëndësishme është se kush nga vjen pasi tash e tutje gjithë do të jemi VLEN”. Besoj se do të keni një ndarje, nuk do të jetë figurat e njërës apo tjetrës? “Derisa të shkrihet mirë ato vijat, mendoj se do të ketë, mirëpo intenca është ato vija të shkrihen dhe të jetë VLEN-i një”, shtoi Mexhiti.
Lidhur kritikat e fundit të ministrit Fatmir Limanit dhe përplasjet e zëvendëskryeministrit Arben Fetai me partinë e tij ASH, Mexhiti tha se që të dy janë themelues dhe vazhdojnë të jenë pjesë e VLEN-it. /Alsat.mk
