Endrit Shala, person i afërt me zëvendëskryeministrin e Kosovës, Fatmir Limaj, mohon të jetë personi i cili në videon e re të publikuar nga Malishevapress, shihet duke gjuajtur me automatik.
Shala i ka thënë portalit Koha.net se nuk është ai person në foto.
“Nuk jam unë personi i cili shihet në atë video. As që kam gjuajtur me armë të gjatë. Për atë që ka ndodhur tashmë e kam sqaruar”, ka thënë shkurt Shala.
Portali lokal Malishevapress raportoi se ende pa kaluar një javë e plotë prej kur ishte thirrur në interpelancë kryeministri i vendit për t’u përgjigjur para deputetëve për shtënien me armë nga zv/kryeministri Dardan Gashi, i cili kishte gjuajtur me armë në një aheng të organizuar nga Fatmir Limaj, sërish ky i fundit bëhet protagonist i skenave të tilla të prishjes së rendit publik dhe shkaktimit të rrezikut nga të shtënat me armë. Portali thotë se personi që shihet duke gjuajtur me automatik është Endrit Shala.
