Udhëheqësi i Koresë së Veriut Kim Jong Un dhe vajza e tij e vogël dolën në qendër të skenës në një paradë të madhe ushtarake, duke nxitur spekulimet se ajo po përgatitet si një udhëheqëse e ardhshme e vendit të izoluar, ndërsa babai i saj tregoi raketat e tij më të fundit, më të mëdha bërthamore.
Parada e së mërkurës mbrëma në kryeqytetin, Penian, shfaqi pajisjen më të re në arsenalin bërthamor në rritje të Kim, duke përfshirë atë që ekspertët thanë se ishte ndoshta një raketë e re balistike ndërkontinentale me lëndë djegëse të ngurtë që ai mund ta testojë në muajt e ardhshëm.
Kjo raketë ishte pjesë e rreth një duzinë trupash “ICBM” të Kim-it të paraqitura në këtë ngjarje, një numër i paprecedentë që nënvizoi sesi ai vazhdon të zgjerojë aftësitë e tij ushtarake pavarësisht burimeve të kufizuara përballë thellimit të tensioneve me fqinjët e tij dhe Shtetet e Bashkuara.
Parada ishte paraqitja e pestë e njohur publike nga vajza e Kimit, Kim Ju Ae, fëmija i tij i dytë i lindur që besohet të jetë rreth 10 vjeç. Të martën, Kim Jong Un solli vajzën e tij për të vizituar trupat teksa lavdëroi “fuqinë e parezistueshme” të ushtrisë së tij të armatosur bërthamore, raporton Associated Press, transmeton Klankosova.tv.
Mediat shtetërore kanë sinjalizuar një rol të lartë për Kim Ju Ae. Ajo është konsideruar “e respektuar” dhe “e dashur”, dhe një foto e publikuar të martën e tregonte atë të ulur në sediljen e nderit në një banket, e rrethuar nga gjeneralët dhe prindërit e saj.
