Incidentet në sallën e kongresit të UEFA-s në Beograd ku u hoqën simbolet e Kosovës u paraprinë edhe me diegien e flamurit nga huliganët serbë. Në një video të publikuar në rrjetet sociale shikohet veprimi i tyre që ka sjellë edhe reagimin e FFK-së.
“Sigurisht, si gjithmonë, persona të caktuar ndjekin agjenda kundër Kosovës dhe largojnë nga tavolina, madje edhe djegin flamurin e shtetit tonë (siç ndodhi në Beograd nga tifozë të klubeve serbe), por Kosova si shtet është dhe mbetet një realitet i pakthyeshëm. FFK-ja menjëherë do të paraqesë notë proteste në UEFA dhe institucionet tjera ndërkombëtare lidhur me këto veprime”, thuhet në reagimin e Federatës së Futbollit të Kosovës.
Ndërkohë në fjalimin e tij në kogresin e mbajtur të enjten kreu i UEFA-s, Aleksander Ceferin tha se futbolli ndërton ura dhe është më shumë se një sport.
Ceferin përmendi organizimin e përbashkët të Kampionatit Europian U21 në 2027 nga Shqipëria dhe Serbia si një rikujtesë të shkëlqyer se nuk ka kufij në futbollin europian. Ai i ftoi të gjithë të lënë pas historitë e së shkuarës për të ndërtuar së bashku një të ardhme më të mirë.
Tv Klan
