Në Prishtinë po mbahet Takimi i Ndërmjetëm i Rajonit Evropa II të Egmont Group, i cili ka mbledhur përfaqësues të Njësive të Inteligjencës Financiare nga i gjithë rajoni për dy ditë diskutimesh strategjike, shkëmbimi përvojash dhe forcim bashkëpunimi në luftën kundër pastrimit të parave dhe financimit të terrorizmit.
Ngjarja u hap nga Kryeministri në detyrë i Kosovës, Albin Kurti, i cili theksoi përparimin e konsiderueshëm të vendit në forcimin e kuadrit ligjor dhe institucional dhe harmonizimin me standardet ndërkombëtare.
Ai vlerësoi gjithashtu punën e Njësisë së Inteligjencës Financiare të Kosovës, duke nënvizuar se Qeveria mbetet plotësisht e përkushtuar në mbështetjen e saj dhe të institucioneve të tjera përgjegjëse, njofton Njësia e Inteligjencës Financiare.
Ambasadori gjerman në Kosovë, Rainer Rudolph, në fjalën e tij vuri në dukje se flukset e paligjshme financiare rrezikojnë rendin global dhe sigurinë ekonomike, duke theksuar rëndësinë e rolit të FIU-ve dhe mbështetjen që Gjermania u ofron gjashtë njësive të tilla në Ballkanin Perëndimor.
Drejtori i NJIF-it të Kosovës, Genc Rraci, deklaroi se prania e Kryeministrit Kurti tregon angazhimin e fortë politik të Kosovës dhe mbështetjen e qeverisë për punën e Egmont Group dhe bashkëpunimin ndërkombëtar. Ai theksoi se ndarja e informacionit dhe puna e përbashkët e bëjnë këtë rrjet më efektiv.
Gjatë ditës së parë, rajoni miratoi një dokument të rëndësishëm mbi Rezultatin e Menjëhershëm 2 dhe 6, si dhe Rekomandimet 29 dhe 40 të FATF, i bashkë-udhëhequr nga FIU i Azerbajxhanit dhe Gjibraltarit. Dokumenti analizon 23 Raporte të Vlerësimit të Ndërsjellë të FATF dhe MONEYVAL, duke identifikuar pikat e forta të përsëritura, dobësitë sistemike dhe veprimet e rekomanduara për rritjen e efektivitetit në përdorimin e inteligjencës financiare dhe bashkëpunimin ndërkombëtar.
Prezantimi i FIU të Gjibraltarit nxori në pah nevojën për forcimin e përdorimit të inteligjencës së FIU-ve nga autoritetet e zbatimit të ligjit, përmirësimin e cilësisë së raporteve të transaksioneve të dyshimta dhe rritjen e kapaciteteve analitike. Dokumenti pritet të ndahet edhe me rajonet tjera të Egmont Group për të zgjeruar përfitimet dhe shkëmbimin e praktikave më të mira.
Egmont Group Rajonal i Evropës II do të vazhdojë të mbështesë objektivat e përgjithshme të organizatës, duke nxitur zhvillimin profesional, bashkëpunimin dhe shkëmbimin e përvojave në nivel rajonal.
