Në shënim të Ditës së Diasporës, kryeministri Albin Kurti ka zhvilluar bashkëbisedim me mërgimtarë, profesionistë të fushave të ndryshme, që po qëndrojnë në Kosovë.
Në këtë bashkëbisedim morën pjesë zëvendëskryeministrja, njëherësh ministrja e Punëve të Jashtme dhe Diasporës, Donika Gërvalla dhe zëvendësministrja e Punëve të Jashtme dhe Diasporës, Liza Gashi.
Në hapje të takimit, kryeministri Kurti ka theksuar se qeveria ka vëmendje të veçantë për mërgatën dhe kjo është reflektuar edhe në programin e qeverisë.
Ai ka vlerësuar se mërgata është pjesë vitale e kombit, e cila ndodhet jashtë atdheut, por, patjetër se është brenda kombit.
“Këtë rëndësi kaq të madhe të mërgatës tonë, ne synojmë që ta shndërrojmë në prioritet në qeverisjen tonë në muajt e në vitet në vijim, duke e llogaritur mërgatën si pjesë thelbësore të zhvillimit të qëndrueshëm”, ka thënë Kurti.
“Sepse e dimë që nuk ka një popull tjetër në zhvillimet historike të të cilit mërgata ka pasur një rol kaq vendimtar. Ky është një borxh të cilin nuk do të mund t’ua paguajmë kurrë, veçse ajo çka zotohemi është që të punojmë bashkë për të mirën e përbashkët edhe tuajën atje, edhe tuajën kur të vini këtu edhe të qytetarëve të Republikës e të familjeve tuaja, të cilët ju i vizitoni shpesh gjatë vitit”, ka thënë kryeministri Albin Kurti, në përmbyllje të bashkëbisedimit me mërgimtarët.
Qeveria e Kosovës do të krijojë një program nacional për transferim të dijes dhe përvojës nga diaspora në Kosovë.
“Në këtë drejtim, ne po punojmë ta fuqizojmë rolin ndërmjetësues të diasporës në takime të niveleve të larta tek vendimmarrësit politikë dhe korporatat e mëdha në vendet ku ata jetojnë, duke krijuar mekanizma për angazhim”, ka thënë ajo.
