Sot para Komunës së Gjilanit, aktivistë të degës së Lëvizjes Vetëvendosje në Gjilan kanë shpërndarë mirënjohje për kryetarin e Komunës Lutfi Haziri. Në një aksion simbolik të organizuar para zyrës së kryetarit të qytetit Lutfi Haziri, aktivistët kanë shpërndarë “mirënjohje” për mospunën e tij.
Zyra e Lëvizjes Vetëvendosje ka reaguar lidhur me këtë aksion. Në komunikatën e saj ka thënë se në mes mirënjohjeve të sotme janë mirënjohja e banorëve të qytetit mbi kundërmimin e ujërave të zeza të cilat po vazhdojnë të mos trajtohen seriozisht.
Mirënjohje për gropat e shumta në qytet e në fshatra. Mirënjohje për drejtorët e kësaj qeverisje që më shumë kalojnë kohë në Prokurori e Gjykata se në vendet e tyre të punës.
Mirënjohje për palestrën e sporteve në Zhegër, që për 4 vite punë është ndërtuar vetëm një pjesë e themelit. Mirënjohje për Shtëpinë e Kulturës në Përlepnicë që nuk u ndërtua kurrë.
Mirënjohje për ndërtimet pa leje që e kanë bërë Gjilanin një kaos urbanistik e për shumë e shumë premtime të parealizuara në çdo lagje të fshatit e çdo pjesë të qytetit.
Mirënjohjet që janë të llojeve të ndryshme, formateve e dizajneve të ndryshme, urojmë që t’i plotësojnë sirtarët e kryetarit të komunës, në mënyrë që të ndalet nga ky ofendim që po ju bëhet qytetarëve të Gjilanit me dekorata e çmime të rrejshme. Nëse edhe këto nuk I mjaftojnë kryetarit, atëherë aktivistët e Lëvizjes do të sajojnë edhe dekorata të tjera në mënyrë që të kënaqin apetitet e kryetarit Haziri kanë përfunduar Zyra e Lëvizjes Vetëvendosje në Gjilan
Ata kanë ironizuar me mirënjohjet dhe çmimet që Lutfi Haziri ka marrë nga organizata të ndryshme fantome. Ditë më parë, ai pranoi çmimin “Nelson Mandela” nga e ashtuquajtura Akademia Universale e Paqes Globale.
Në korrik të vitit të kaluar, Haziri kishte marrë çmimin “Figurë e Paqes” nga një tjetër organizatë, Komiteti Botëror i Paqes, që nuk dihet misioni dhe funksioni saj.
