Një 24-vjeçar është arrestuar nga policia në Tiranë, pasi është kapur duke qarkulluar me armë zjarri pa leje në automjetin e tij.
Sipas policisë, i arrestuari është shtetasi me iniciale M. N, i cili u kap në rrugën “Xhanfize Keko”, teksa lëvizte më një automjet tip “BMW”.
Mësohet se gjatë kontrollit, blutë i kanë gjetur në mjet një çantë supi, ku 24-vjeçari mbante një armë zjarri pistoletë dhe municion luftarak, të cilat u sekuestruan në cilësinë e provës materiale.
Njoftimi i policisë
Tiranë/ Kontrolle të befasishme nga shërbimet e Forcës së Posaçme “Shqiponja, për kapjen e shtetasve që qarkullojnë me lëndë narkotike, armë zjarri dhe sende të kundërligjshme.
Gjatë kontrolleve, u kap në flagrancë dhe u vu në pranga një 24-vjeçar që qarkullonte me armë zjarri pistoletë në automjet.
Nga kontrollet e befasishme të kryera në zona të ndryshme në Tiranë, shërbimet e Forcës së Posaçme “Shqiponja”, në bashkëpunim me shërbimet e Komisariatit të Policisë Nr. 4, kanë goditur një rast të armëmbajtjes pa leje, për të cilin u arrestua shtetasi M. N., 24 vjeç.
Në rrugën “Xhanfize Keko”, shërbimet e Policisë kanë ndaluar automjetin tip “BMË” që drejtonte ky shtetas, në të cilin, gjatë kontrollit, kanë gjetur një çantë supi ku 24-vjeçari mbante një armë zjarri pistoletë dhe municion luftarak, të cilat u sekuestruan në cilësinë e provës materiale.
Gjatë kontrolleve të befasishme, janë verifikuar dhe kontrolluar dhjetëra shtetas dhe automjete. Kontrollet do të vijojnë në të gjithë qarkun.
