Emocionet ishin të shumta në mesin e palestinezëve, të cilët u mblodhën për ta mirëpritur lirimin e adoleshentes Ahed Tamimi, i cila për 8 muaj është mbajtur në burgjet izraelite.
Familjarët u panë mjaft të lumtur me lirimin e vajzës së tyre 17-vjeçare, raporton KTV.
Adoleshentja palestineze Ahed Tamimi qëndroi tetë muaj në burg për sulmin ndaj një ushtari izraelit në Bregun e pushtuar Perëndimor.
Vitin e kaluar, ajo reagoi ndaj një ushtari jashtë shtëpisë së saj në Nabi Saleh.
E, videoja kishte bërë jehonë në tërë botën.
Për palestinezët ajo u bë simbol i rezistencës ndaj okupimit izraelit, por shumë izraelitë e shohin atë si person që dëshiron vëmendje.
Si 16-vjeçare, ajo u përball fillimisht me 12 akuza për sulm, nxitje, reagim dhe gjuajtje me gurë ndaj ushtarit.
Në mars, ajo e pranoi fajin për katër nga akuzat.
Gjatë seancave gjyqësore, Tamimi tregoi arsyen pse e kishte sulmuar ushtarin.
Ajo e kishte parë skenën kur kushëriri i saj 15-vjeçar ishte qëlluar në kokë me plumb gome nga ushtari izraelit.
Rasti i Ahed Tamimit i thelloi edhe më shumë pikëpamjet e kundërta mes izraelitëve dhe palestinezëve.
Pas incidentit, ministri izraelit i Arsimit kishte thënë se ajo meriton ta kalojë tërë jetën në burg.
Ahed është bërë ikonë në Palestinë.
Palestinezët e shohin veprimin e saj si akt trimërie ndaj ushtarëve të armatosur në tokën e pushtuar.
