Instituti Kombëtar i Shëndetësisë Publike ka njoftuar se nga fillimi i shkurtit e deri në fund të majit të këtij viti janë regjistruar 2 mijë e 200 raste të pickimeve nga rriqrat në nivel vendi. Sipas të dhënave të këtij instituti gjysma e këtyre rasteve kanë ndodhur në komunat e rajonit të Prizrenit, që njihen si zona endemike, si Malisheva, Suhareka dhe Rahoveci.
“Numri më i madh i pickimeve është nga Komuna e Malishevës 538 raste, Suhareka 446 raste, Klina 249 raste, Rahoveci 123 raste dhe komunat e tjera me numër më të vogël të rasteve”, thuhet në një komunikatë të IKSHP-së. Komunat ajo e Malishevës, Suharekës dhe e Rahovecit kanë njoftuar se janë në zbatim të masave për luftimin dhe parandalimin e etheve hemorragjike Krime Kongo, shkruan sot Koha Ditore.
Zyrtarët e IKSHP-së kanë bërë të ditur se krahasuar me periudhën e njëjtë të viteve paraprake ka një rritje të lehtë sa u përket rasteve të pickimeve të rriqrave.
IKSHP-ja gjithashtu ka informuar se rasti i parë pozitiv me Ethe Hemorragjike Krime Kongo është regjistruar në fshatin Bresalc, Komuna e Gjilanit, ku pacienti është hospitalizuar në Klinikën infektive të SHSKUK dhe pas trajtimit me sukses është lëshuar në shtëpi.
