Detaje të reja janë zbuluar nga plagosja e dyfishtë e ndodhur në Shkodër një ditë më parë (15 shtator), ku u qëlluan me armë zjarri VBesmir Çofi dhe Avenir Hasanaj nga Lul Rakaj.
Autori i dyshuar, i cili është arrestuar pas disa orësh nga ngjarja, ka dhënë dëshminë e tij në policinë vendore të Shkodrës.
ai deklaroi se të plagosurit i kanë dhunuar nipin e tij për një konflikt për të cilin ai nuk është në dijeni të detajeve.
Sipas 38 vjeçarit, ai shkoi për t’u sqaruar me Çofin dhe Hasanajn e më pas nisi debati mes tyre.
Autori dyshoi se një prej të plagosurve ishte i pajisur me armë zjarri, e për të shmangur vrasjen e tij ai qëlloi ndaj tyre.
“Pak ditë më parë dy personat që kam plagosur kanë goditur nipin tim duke e rrahur. Nuk e di se çfarë konflikti kanë pasur por di që më kanë goditur nipin i cili më tregoi për ngjarjen e ndodhur. Unë shkova për të folur me ta dhe aty nisi debati. Dyshova se njëri prej tyre kishte armë zjarri ndaj duke menduar se mund të më vrisnin qëllova ndaj tyre”, mësohet të ketë thënë në dëshminë e tij i arrestuari Lul Rakaj.
NGJARJA
Ngjarja ndodhi një ditë më parë, më 15 shtator në rrethrrotullimin e Grikës në Malësinë e Madhe në hyrjen e një lokali. Shtetasi Lul Rakaj dyshohet se qëlloi 8 herë në drejtim të Besmir Çofit dhe Avenir Hasanaj duke i lënë të plagosur. Hasanaj mori një plumb në gjoks dhe ishte në gjendje të rëndë shëndetësore.
Pas operacionit në spital kaloi rrezikun për jetën. Pas ngjarjes në ndihmë të efektivëve të Shkodrës mbërritën forcat speciale RENEA të cilat pas pak orësh arritën të prangosin Lul Rakaj.
Arrestimi i tij u bë në afërsi të ballkonit panoramik të Tamarës në Malësinë e Madhe. 38 vjeçari tentoi që të çajë rrethimin e RENEA por forcat speciale arritën ta ndalojnë. Në automjet Lul Rakaj kishte edhe bashkëshorten. Arma e zjarrit tip pistoletë nuk është gjetur ende dhe policia po punon për ta gjetur dhe sekuestruar si provë. Lul Rakaj në vitin 2004 ka vrarë shtetasin Kolë Gjokaj duke u hakmarrë për babain e tij të vrarë nga vëllai i Kolë Gjokaj më përpara. Pas afro 15 vitesh burg Lul Rakaj u lirua duke u përfshirë në këtë tenativë vrasje me dy të plagosur.
