Një gjykatë shqiptare urdhëroi sot ndalimin e dy rusëve dhe një ukrainas të dyshuar për spiunazh, të cilët u arrestuan të shtunën kur u përpoqën të futeshin me forcë në një fabrikë armësh, duke ‘plagosur’ dy ushtarë.
“Mendimi i gjykatës është që ata të qëndrojnë në dispozicion të drejtësisë deri në përfundimin e hetimeve”, tha kryetarja e Gjykatës së Elbasanit, pas seancës me dyer të mbyllura. Tre të pandehurit dyshohet se u përpoqën të fitonin akses në “informacione ushtarake ose të tjera” në mënyrë që t’ia dorëzonin atë një “fuqie të huaj”, shtoi gjyqtarja.
Nëse dalin në gjyq dhe shpallen fajtorë, rrezikojnë deri në 10 vjet burg. Ata mohojnë të gjitha akuzat dhe kërkojnë të lirohen, siç thanë avokatët e tyre.
Sipas ministrit të Mbrojtjes, Nikos Peleshi, një nga të dyshuarit ka sulmuar gardianët të cilët e kanë surprizuar teksa po bënte foto në fabrikën e Gramsh, ku çmontohen armë të papërdorura. Ministri tha, duke vizituar dy ushtarët e plagosur në spital, se “në përpjekje për të dalë jashtë kontrollit, një nga rusët, M.Z., 24 vjeç, ka përdorur një spraj me agjent nervor kundër rojeve”.
Ushtarët u plagosën në sy.
24-vjeçari u arrestua së bashku me një tjetër rus, S.T., 33 vjeç dhe 25-vjeçarin ukrainas F.A., të cilët e prisnin në një makinë pranë fabrikës.
Policia ushtarake, antiterrorizmi dhe inteligjenca u mobilizuan për të hetuar ngjarjen.
Shqipëria është anëtare e NATO-s që nga viti 2009./GSH
