Gazetar: Avni Islami
“….Kjo është një histori e veçantë që pas shumë përpjekjeve, vijmë në një gjendje jashtëzakonisht të fuqishme që të rregullohet me ligj statuti i medresesë “Isa Beu” me të gjitha paralelet e saj”, tha Islam Islami, Drejtori i Shkollës së Mesme Islame “Medreseja Isa Beu”.
Drejtori i Shkollës së Mesme Islame “Medreseja Isa Beu”, Islam Islami shprehet i kënaqur nga zgjidhja ligjore me të cilën, medresantët do të mund të regjistrohen në të gjithë universitetet e vendit, me kushtin e vetëm atë të nënshtrimit të provimit të maturës shtetërore. Sipas zgjidhjes ligjore, e cila për disa ditë pritet të jetë në seancë qeveritare për miratim, shkollat fetare, si ajo Teologjike Ortodokse Maqedonase “Shën Klimenti i Ohrit” – Shkup dhe Shkollës së Mesme Islame “Medreseja Isa Beu” – Shkup do të përshtatin planprogramet e tyre mësimore të gërshetuara me ato të gjimnazit dhe atë fetar të bazuar në statusin e tyre si shkolla fetare.
Në një intervistë për ALSAT, drejtori i Shkollës së Mesme Islame “Medreseja Isa Beu”, Islam Islami Tregoi se si do të ngjajë ky plan program.
“Të gjitha këto lëndë të gjimnazit i kishim edhe më herët por edhe lëndët fetare apo profesionale, tani me ligj ne do t’i përshtatemi Ministrisë së Arsimit që lëndët e gjimnazit të jenë nën mbikëqyrjen e ministrisë së Arsimit, që pas kryerjes, pas katër vjet të medresantit, ai do t’i nënshtrohet provimit të maturës shtetërore dhe pas nënshtrimit të provimit të maturës shtetërorë ai do të ketë të drejtë të regjistrohet në çdo universitet jashtë asaj që është fetare, në universitete të ndryshme që janë në Republikën e Maqedonisë së Veriut. Pra, me këtë ligj, Shkolla e Mesme Fetare Islame “Medreseja Isa Beu” do të ketë trajtimin e njëjtë të të gjitha shkollave publike të cilat janë në Maqedoninë e Veriut”, tha Islam Islami, Drejtori i Shkollës së Mesme Islame “Medreseja Isa Beu”.
Siç zbardhi nga përmbajtja e draftligjit ditë më parë ALSAT, Byroja për Zhvillimin e Arsimit do të jetë ombrella e përputhshmërisë së planprogrameve të shkollave fetare, dhe, që Byroja të japë mendim pozitiv, duhet që planprogramet e këtyre shkollave të përputhen me Konceptin për maturën shtetërore, Maturën shkollore dhe Provimin përfundimtar të miratuar nga Ministria e Arsimit. Nuk është përjashtuar edhe mundësia për gjetje ligjore për ata medresantë që veçse janë në rrjedhë e sipër në studimet që nuk i përfshin zgjidhja e re ligjore.
“Do të ketë edhe retroaktivitet të ligjit apo mbikëqyrje tjetër që t’u mundësohet atyre të regjistrohen, pra do të ndalemi të punojmë në këtë segment”, theksoi ai.
Islami tha se zgjidhja ligjore i jep zgjidhje përfundimtare edhe statusit të medresesë, pas 30 vitesh që nga funksionimi i saj. Zgjidhja e deridjeshme e kryeministrit teknik Talat Xhaferi u rrëzua nga Gjykata Kushtetuese në prill të këtij viti, por përmes vullnetit politik, u ofrua zgjidhje akoma më e mirë.
“…Kjo qeveri aktuale për ne dhe posaçërisht për “Medresenë Isa Beu”, atë që e tha, besoj që është duke e përmbyllur në mënyrën më të mirë dhe ashtu siç duhet të bëhet”, theksoi Islam Islami, Drejtori i Shkollës së Mesme Islame “Medreseja Isa Beu”./Alsat.mk
