Një ditë pas rrënimit të murit në Veriun e Mitrovicës, ministri i Planifikimit Hapësinor, Ferat Shala, ka dhënë detaje se çfarë do të ndërtohet në pjesën ku ka qenë i vendosur muri.
Shala në një emision televiziv, sot gjatë ditës ka thënë se në atë pjesë do të ndërtohet një shteg i biçikletave.
Ai ka thënë se i gjithë procesi do të mbikëqyret nga ana e Qeverisë së Kosovës.
“Do të jenë me të njëjtat kritere siç janë sheshet në mbarë botën. Në vendin ku ka qenë muri do të ketë vetëm stazë të sigurisë dhe stazë të biçikletave. Ne si ministri do t’i mbikëqyrim situatën. Plani është i dizajnuar deri në detaje se ashtu ka qenë marrëveshja”, ka thënë Shala.
Ai i ka uruar asamblistët në Veriun e Mitrovicës të cilët e aprovuan kërkesën për rrënimin e murit.
“Projekti është i hartuar, dhe nuk do të ketë më nevojë që të ndërpritet. Për herë të parë asambleja komunale e Mitrovicës së veriut ka miratua një projekt për rrënimin e këtij muri”, ka shtuar ai.
